Williamnagar, Nailur 01 : Kum shi bynta ka jingrakhe ïa ka sngikha ba 75 jong u Lamphang barim ka Lok Sabha, u PA Sangma, na ka liang u Myntri Rangbah ka jylla u Conrad K Sangma ha kane ka sngi Ba-ar da kaba ñion ïa u budam u la phah ïa ka jingkyrshan pisa beit beit sha palat 1200 tylli ki longïing na ka skim FOCUS +, kaba buh thong ban ai jingïarap sha ki longïing kiba im da ka rep ka riang ha ka jylla.
Ha kane ka sngi ka sorkar jylla ka la pyllait haduh 32.20 lak tyngka lyngba ka FOCUS Farmer’s Welfare Programme bad haduh 12.69 lak tyngka lyngba ka skim ‘FOCUS+ Benefit Scheme’ kaban pynmyntoi ïa kumba ar hajar ngut ki nongrep.
Nalor kine, la sam ruh ïa ka song pisa kaba kot sha ka 11.60 lak tyngka sha ki 23 tylli ki group hapoh ka YESS Meghalaya Youth Empowerment Programme. Ka YESS kadei ka skim kaba la mang naka bynta ban tei bad kyntiew ïa ki kynhun jong ki samla ha ki kam imlang sahlang bad ruh ha ki kam ïalehkai.
Hapoh ka Rural Backyard Piggery Scheme, PROGRESS, la sam haduh 76 ki khun sniang sha ki nongri jingri kiba dei na East Garo Hills District. Lyngba kane ka PROGRESS kiban myntoi kin poi haduh kumba 10,000 ngut k inongrep bad kane ka long ban kyntiew ïa ka rukom im bad ka ïoh ka kot jong ki nongrep ha ka jylla.
Kitei baroh ki prokram ki dei shi bynta jongka jingbuh mawnongrim na ka bynta ka Williamnagar Urban Water Supply Project Phase -I na ka skim AMRUT 2.0. ha ryngkat ka jingsakhi lang jong palat 5,000 ngut ki nongshong shnong ka East Garo Hills ha ryngkat ka jingdonlang u Myntri Khynnah ka tnad Housing bad Urban Affairs ka sorkar India, u Kaushal Kishore.
Haba kren ha katei ka jingïalang, u Myntri Rangbah u la ong ba ha kine ki saw snem tam ki la lah ban pynkylla ïa ka Meghalaya na ka jylla kaba duna bha ka rukom trei sha ka jylla kaba kiew stet bha.
“Ïa ka jingtreikam jongngi la ithuh ruh da ka sorkar India bad wat shabar ruh ha kaba ki khusnam kum ha ka kam jngohkai pyrthei, ka jingpynpoi umbam umdih, nangta ka UN Award na bynta ka IT bad bun kiwei pat. Hynrei la katta donkam ban nang pynjur shuh shuh ka rukom treikam ban pynlong ïa ka jylla kum kawei na ki 10 tylli ki jylla kiba hakhmat duh,” u la ong.
U ong ruh ba ym don ka sngi kaba khraw tam ban plie ïa u mawnongrim na ka bynta ban tei ïa katei ka projek umbam kaba 121 klur tyngka ba la beit da ka sorkar pdeng lyngba ka AMRUT 2.0 kaban pynmyntoi ïa kumba 1.42lak ngut ki nongshong shnong ka thain.
