Shillong, Naiwieng 04 : Ki thei ïalehkai phutbol jong ka Laitkor SC ki la pyni shisha ïa ka jingkhlain hadien ba ki la lah ban pynliem haduh 10-1 kol ïa ka kynhun ïalehkai jong ka Mawten SC ha ka jingïalehkai Quarterfinal ba nyngkong jong ka Meghalaya Women’s State League 2025 kaba long ha madan SSA First Ground, Polo, ha ka step sngi Ba-ar.
Ki nongthep kol na ka bynta ka kynhun ki kynthup ïa ka hat-trick na ka Ïaraplang Nongrum (2’, 12’, 44’), mar ar kol na ka Ibashisha Khongwet (49’, 63’) bad ka Inrila-i-dor Khongthaw (55’, 58’) bad mar shi kol na ka Ideibanrishisha Kharpan (26’) Ibakordor Wahlang (40) bad Sukrilin Marshillong ha ka minit kaba 90+1.
Watla ka jingïakhun ka la long kaba noh shilliang hynrei ka Mawten ka la ïoh pat ban pynkhih lang ïa ka jar jong ka Laitkor lyngba ka Lavinia Lyngkhoi ha ka minit kaba 72 lyngba ka bol kaba ka khyrwit na jngai bha.
Ka Laitkor (na ka Shillong Sports Association) ka la long ka kynhun ba hakhlieh duh ha ka Group A, katba ka Mawten (Mawkyrwat District Sports Association) ka la wan ha ka kyrdan ba saw ha ka Group B. Da ka jingjop saw sien ha ka group stage, ka jingjop mynta ka sngi ka long ka jingjop kaba san lynter ïa ka Laitkor.
Ka Ïaraplang kaba la paw bha ha baroh kawei ka samoi ïalehkai, ka la ïoh ruh ban khur ïa ka khusnam Player of the Match bad pdiang ïa ka memento na u Bah Cliff Nongrum, Vice President ka Meghalaya Football Association.
Ki lai tylli ki jingïalehkai quarterfinal kiba dang sah baroh kin long mynta ka sngi Balang. Ka Na Rympei Football Academy kan ïakhun pyrshah ïa ka Bright Future SSCC ha ka por 10 baje mynstep, bud sa ka Pay For Right Football Academy pyrshah ïa ka Mawlum Tyrsad SC ha ka por 1:00 baje nohphai sngi. Nangta ka Diengshynrum SC bad ka Jakrem SC kin ïakhun ha ka por 4baje janmiet. Kine ki jingïakhun kin long ha madan ïalehkai SSA.
