Shillong, Rymphang 11 : Ka jingpynkhreh ban siang rong noh shen ïa ki surok shnong ha Lynshing, Mawkynrew C&RD Block ka la wanrah ka jingsngewkmen kaba shi katdei eh ïa ki nongshong shnong bad kane ka la pynlong ïa ki nongïalam shnong ban pynpaw ka jingsngewnguh kaba khraw na ka bynta u MLA ka Mawkynrew Constituency, u Bah Banteidor Lyngdoh.
Kane ka dei ruh ka jingurlong ka jingangnud ki nongshong shnong kaba lah da ki phew phew snem, la ong ki nongïalam shnong. Ïa kine ki surok shnong yn pynbha bad siang rong ïa ki ha ka mang tyngka kaba long shi klur tyngka bad ka lynter kyllum jong kine ki surok ka long kumba 1 kilometer tam eiei.
Ha ka 07 tarik u Rymphang, 2024, u MLA ha ryngkat ki ophisar ka tnad PWD (Roads) By Pass Division ba kynthup ïa u Bah S Lytep, Executive Engineer ki la hiar ban jurip ïa katei ka jingpynkhreh ban siang rong ïa katei ka surok ha ka jingïadonlang ki nongïalam shnong ryngkat ki riewrangbah lem ki nongïalam ka Balang Presbyterian katei ka shnong.
Kane ka jingshna ïa ki surok ka dei ruh shwa ban wan ka jingïaseng Presbytery ha katei ka shnong ha kaba katei ka sngi la leit jngoh ruh ïa ka madan ban pynlong ïa ka jingïaseng . Hadien katei ka jingjurip ka la don ruh ka jingïalang ha Ïing Shnong katei ka shnong ha kaba la ïa thir jingmut na ka bynta kane ka surok.
U Bah Banteidor haba kren ha ka jingïalang u la ong, “Ka jingkyntiew ïa ka roi pat ka dei ka kam kaba ha khmat yn da la dep ka elekshon bad ngi hap ban ïatreilang ban kyntiew ïa ka thaiñ. Ka jingurlong kane ka surok ka dei lyngba ka jingïatreilang kaba dei pat ka lynti sha ka roi ka par bad ka ïoh ka kot ki nongshong shnong “.
