Hadien ka jingjia ha Mukroh ïa kynduh ka Regional Committee ban pynsted ïa pynbeit pud ha Ri-Bhoi

Nongpoh, Naiwieng 30:Tang hadien phra sngi jong ka jingshah siat iap ki hynriew ngut ki mynsiem briew ha Mukroh ha ki pulit Assam mynta ka sngi ka Regional Committee ban pynbeit ïa ka kam pud kam sam haka thaiñ Ri-Bhoi, kaba dei ruh ka jingpynbeit pud haka wat ba ar haki 4 tylli ki jaka kajia pud bala khlieh da u symbud myntri rangbah ka jylla, u Bah Prestone Tynsong, kala sdang ban shong biang da ka jingïalang ha Conference Hall jong ka ophis u Deputy Commissioner na ka bynta ban bteng bad pynsted biang ïaka jingïakren ban pynbeit ïa u pud u sam hapdeng ka jylla Assam bad Meghalaya .
Ha katei ka jingïalang naka liang ka Committee kala khot lang ruh ïaki nongmihkhmat na Ri-Bhoi naduh u Bah Mayral Born Syiem MLA Nongpoh, Bah Sosthenes Sohtun MLA Jirang, Bah Dasakhiatbha Lamare MLA Mawhati, ki nongmihkhmat na ka KHADC, U Arpit Upadhayay, Deputy Commissioner ka Ri-Bhoi u ba long ruh u Member Secretary ka Committee, u SP ka Ri Bhoi, u Giri Prasad, ki nongsynshar Hima bad nongsynshar shnong naduh ki Syiem, ki Myntri jong ki Hima bad ki raid bapher bapher.
Haba kren sha ki lad pathai khubor hadien ka jingïalang naka liang u Bah Prestone Tynsong u ba la khlieh ïa katei ka Committee kum u Chairman, u Bah Porestone Tynsong u la ong ba kane ka dei ka jingïalang ba nyngkong hadien bala thaw ïaka Regional Committee ban pynbeit ïa u pud u sam haka wat kaba ar, ha kaba u la pynpaw ba ha Ri-Bhoi ki don 4 tylli ki jaka kajia pud bad ha katei ka sngi la ïakren ban pynbiang shuwa tang ïaka Block II bad ka Desh Demoreah bad kitei ki 2 tylli kiba sah yn sa pynbeit pat ban ïakren kham hadien.
U la ong ruh ba ha katei ka jingïalang la ioh ban ïakren bad phylliew jingmut ha kaba ïadei bad kitei ki 2 tylli ki jaka ïa kajia pud ba kynthup ïaka Desh Demoreah kaba hap ha Hima Mylliem bad ka Block II kaba hap ha Hima Khyriem, namar kito ki jaka bad ki shnong bala dep ban phah kaiphod na ka bynta ban ïa pynbeit ïa ki kam pud ki kam sam ha u snem 2011 khnang ba ngin ioh ban ïa ka kren sha ka sorkar Assam ba kitei ki shnong bad ki jaka ki dei ban wan phai sha ka jylla Meghalaya.
U la ïathuh ruh lyngba kane ka jingïakynduh lang ha kane ka sngi, ka Regional Committee ka la ioh pdiang ruh ïaki kot ki sla na ki Hima bad kumjuh ruh ka kynhun ki Rangbah Shnong ban pynskhem ïa ki shnong ba hap haka jylla Meghalaya ha kane ka jingïapynbeit pud ka ban long ha ka wat kaba ar hapdeng ka Assam bad ka Meghalaya.
Shuh shuh, u la ong ruh ba naka liang ka Committee kan dang ailad shuh shuh lada dang don ki kot ki sla ban pynshisha na ki Shnong, ki Raid bad ki HIma, namar kum ka Committee ka hap ban pule bad pynbiang shuwa nadong shadong shuwa ban ïa kynduh bad ka Regional Committee ka sorkar Assam bad lada donkam naka liang ka Regional Committee kan sa khot biang ruh da ka jingïalang ban pynjanai ïaki kot ki sla shuwa ban poi sha kane ka wat kaba ar halor ka kam pynbeit pud pynbeit sam hapdeng ka Assam bad ka Meghalaya, u la bynrap.