Hadien ka jingïakhun na Arunachal, yn leit aireng u Samla Shanborlang sa sha Delhi

Shillong, Naiwieng 15: Ka long ka burom bad ka jingsngew sarong ïa ka ri bad ka jaitbynriew hi baroh kawei, ha kaba sa shi sien pat u samla Shanborlang Marbañiang ‘Pro Boxer’ ba nyngkong ka jylla Meghalaya ba ka Meghalaya Pro Boxing Council (MPBC) ka la sei ha kine ki snem ba ladep, un sa leit ban aireng biang ha rynsan ïakura ‘Pro Boxing Fight Night’ ka ban sa long ha Arunachal.
Khyndiat ha kaba ïadei bad kane ka rynsan ïakura kaba u Samla Shanborlang Marbaniang un sa leit ban shimbynta la tip da ka APB Fight Night kaba yn sa pynïakhun ha Mopin Solung Ground, Itanagar ha ka 18 tarik Naiwieng, 2023 ha ka por 3 baje nohphaisngi. Ha kane ka sngi kin don haduh 9 tylli ki jingïakhun (Bout), bad na ka liang jong u Shanborlang un sa ïatynjuhbor pyrshah ïa u Kumar Gurung u ba na Arunachal Pradesh ha ka kyrdan ïakhun Super-Fly Weight.
Haba ai jingkren sha ki lad pathai khubor na ka liang jong u Bah Kampherki Thangkhiew-Secretary jong ka MPBC u la ong, “Nga kwah ban ai khublei ïa ki promotion na Arunachal kiba la khot sngewbha ïa u Shanborlang bad kumjuh ruh ïa katto katne ki kynhun kiba la wan shakhmat ban ai ka jingkyrshan lem ïa ka MPBC ha kaba ïadei bad kane ka jingleit aireng shapoh Arunachal”.
Shuh shuh, u la ïathuh ba nalor ka jingïakhun ka ban long hapoh Arunachal Pradesh, u samla Shanborlang Marbaniang un sa pynkhreh ruh ban leit aireng sa sha Delhi pyrshah ïa u International Boxer na dewbah Africa, u Aliu Bamidele Lasisi u ba la khur namjop 17 sien ha rynsan ïakhun pro-Boxing.
Ha kaba ïadei bad ka jingpynkhreh, u Bah Rishanlang Lyngdoh (Coach) u la ïathuh ba ka por kilanmet jong u Shanborlang ka long haduh lai sien ha ka shi sngi ban pyn janai shuh shuh ïa ka rukom ïakhun ka ban long haduh 6 Round.
Ha kaba ïadei bad ka jingkhun ha nongbah Delhi, na ka liang jong u Coach u la ong, “U Shanborlang u la long ba la khreh ban aireng ha katei ka rynsan la ka dei pyrshah ïa u International Boxer, namar na u shimet u la trei shitom bad pynkhrehbha ïalade bad ngi kum ki coach ngi la khmihbha ha ka por kilanmet. La ka dei 6 ne 8 wat ruh..U lah beit ban ïakhun”.
Khyndiat haba phai sha u Shanborlang Marbañiang khun jong i Kong Siblinda Marbañiang, ba shong ba sah hapoh Umlyngka -Upper Shillong, u la sdang ban jam sha ka rynsan ïakura Pro-Boxing naduh u snem 2022, haduh mynta u la ïakhun hynriew sien bad jop 4 sien ïakhaid 2 sien.
Haba ïakren sha ki lad pathai khubor na ka liang jong u samla Shanborlang Marbaiang u la pynpaw ba na ka liang jong u, u kyrmen ban khur ïa ka namjop ha Arunachal bad kumjuh ruh ha ka jingïakhun ka ban long ha Delhi. Shuh shuh, u la ong ba un dang trei shitom bad poi sha ka thong bad ruh ban ïoh bat ïa ka belt kum u lahduh jong ka Super Fly Weight.
U samla Shanborlang u don mynta ha ka thup ba nyngkong napdeng ki rangïakura ka ri India kiba ïakhun ha rynsan ïakura Pro Boxing jong ka kyrdan Super Fly Weight.
U samla Shanborlang Marbaniang ryngkat bad u Coach, Shaiborlang Lyngdoh kin mih na Shillong mynta ka sngi (16 tarik Naiwieng), bad kin pyndep ïa ka weigh-in ha ka 17 tarik katba ka jingïakhun kan long ha ka 18 tarik.