Hadien ka elekshon MP shiteng samoi bad elekshon MDC GHADC yn shim rai u Bah Paul ban neh ne ban mih na ka UDP

Shillong, Risaw 02 : U MLA ka West Shillong bad nongïalam rangbah ka UDP, Bah Paul Lyngdoh, u la ong ba ka rai jong u na bynta ka lawei ha ka saiñpyrthei kan shong ha ka jingmut jong ki nongkyrshan, ki nongtrei bad ki nongthep vote jong u.
Haba kylli la un dang sah ha ka UDP ne un leit sha kawei pat ka party, u la ong, “Ki lad baroh ki dang plie. Kaba kongsan ka long ban sngewthuh ïa ka jingmut jong ki nongkyrshan, ki nongtrei bad ki nongthep vote.”
Katkum ka jingong jong u, ka bor jong ka UDP mynta ka la hiar bha namar ka don satang katto katne ngut ki MLA.
“Baroh kan shong ha ka jingbishar bniah ïa ka jinglong-jingman. Kane kam dei ka jinglong kaba ju jia man ka por, namar ka party ka la hiar sha ka bor kaba rit bha, bad ka lah ban hiar shuh shuh,” u la ong.
U la ong ruh ba ki mat kiba jia ha ka ri baroh kawei kin ktah ruh ïa ka rai jong u, kynthup ïa ki jingïakren kiba ïadei bad ka Election Commission bad ka SIR.
Haba la kylli shaphang ki nongrim kiba yn pyndonkam ban shim rai, u Bah Bah Paul u la ong ba ka dang kloi ban jubab namar ka jingkylli ka dang long tang “lada”.
Haba la kylli lada ka jingkylla ha ka saiñpyrthei mynta kan ktah ïa ka elekshon MLA ha u2028, u la ong ba ha ka saiñpyrthei ym ju don ki paralok ne ki nongshun kiba neh junom.
U la kdew ruh ba ka Meghalaya ka la ju don ki seng kiba long ki nongïaleh pyrshah shuwa ka elekshon, hynrei kiba wan ban ïatreilang hadien ka elekshon.
U la ong ba ka jinglong-jingman mynta ka dang dum bad ym pat shai. Ka jylla ka dang ap ïa ka Shillong Parliamentary bypoll bad ka elekshon GHADC.
“Hadien ba ngi la ïaid lyngba kine ki ar tylli ki elekshon, ngin sa lah ban sngewthuh shai kham bha ïa ka jinglong-jingman jong ka saiñpyrthei ha ka jylla,” u la ong.