Mawkyrwat, Risaw 25: Kum ka dak ban pynsah jingkynmaw bad pynsah nam ïa ka kyrteng jong u (L) Rowell Lyngdoh uba la wanrah ïa shibun ki kam pynroi bad ïa ki matti kiba khraw jong u, ka Mawlangwir Sports Club (MSC) mynta ka sngi ryngkat ka jingïasngewthuh jingmut bad ki bor jong ka shnong Mawlangwir ki la ïoh ban pynkylla noh ïa ka kyrteng na ka ‘Madan Saitsnad’ ba mynshwa sha ka ‘Rowell Lyngdoh Stadium, Mawlangwir’.
Ïa kane la pynkylla ruh da ka jingïasngewthuh jingmut lang bad ki ba ha ïing jong u (L) Rowell Lyngdoh uba dei ruh u MLA barim jong ka Mawkyrwat Constituency ha ki snem ba la leit noh bad uba dei ruh u trai shnong jong ka shnong Mawlangwir, South West Khasi Hills District. Lah ban kdew ruh ba une u rangbah ula wanrah ruh ïa shibun ki kam pynroi na ka bynta ka shnong Mawlangwir, ïa ka distrik bad kumjuh ïa ka jylla hi baroh kawei bad ïa shibun kiei kiei ba ula leh kiba kynthup ïa kane ka Madan Saitsnad kaba don ha shnong Mawlangwir.
Ha kane ka sngi la ïoh ruh ban plie ïa u maw sah jingkynmaw da ki khun ki kti bad kiba ha ïing ha sem jong u (L) Rowell Lyngdoh bad ka jingaisngewbha na ka shnong sha ka khun khadduh jong u.
U bah N.S. Wanniang, Myntri Shnong Mawlangwir ha ka jingkren jong u u la ong ba ka long kaei kaei kaba pynkyndeh mynsiem na ka bynta ka shnong baroh kawei ha kaba mynta ka sngi ki la ïoh ban pynlong ïa ka jingïalang paidbah ban pynkylla ïa ka kyrteng na ka ‘Madan Saitsnad’ ba mynshwa sha ka Rowell Lyngdoh Stadium, Mawlangwir. “U la ong ruh ba u (L) Rowell Lyngdoh u la long kum uwei na ki nongïalam ba hakhmat duh ym tang hapoh ka shnong, hynrei ïa ka distrik, bad ka jylla hi baroh kawei”, ong u Myntri Shnong.
U la pynkynmaw ruh ba dei ha ka por jong u (L) Rowell Lyngdoh la wanrah ïa ka Mawkyrwat Civil Sub Division bad kumjuh ruh ïa ka kyrteng South West Khasi Hills District kaba mynta bad ha kiwei de ki kam pynroi. Namarkata, ha ka jingkren jong u u la ai khublei kyrpang ruh na ka bynta kiba ha ïing ha sem jong u (L) Rowell Lyngdoh kiba la long ka kti kamon ka kti ka diang ha ki por baroh ban pynurlong ïa ki jingthmu kiba bun.
Ha ka jingkren jong u bah Diverland Lyngdoh uba dei kum u khunbyrsa jong u (L) Rowell Lyngdoh ula pynshai lyngkot ïa ka jingïaid lynti jong u (L) Rowell Lyngdoh.
Ïa ka jingïalang la pynïaid da u bah S.K. Budnah, President jong ka Mawlangwir Sports Club, ka jingshad na ka Ri Maram Folk Academy bad ka jingkhublei na u bah Mebandonnam Saiborne.
