Hadien 39 sngi ka jingkulmar ha Tura ïoh kem ki pulit ïa u Nongïalam ka ACHIK
Tura, Nailur 3 : Hadien 39 sngi jong ka jingkulmar ha Tura mynta ka sngi ki pulit ki la ïoh ban kem sa uwei u nongïalam ka ACHIK uba la shah kynnoh donkti pynshit ha ka jingther maw ïa ka Mini Secretariat katba u Myntri Rangbah ka jylla u Conrad K Sangma u dang ïakren bad ki Nongïalam Seng Bhalang ha ka 24 tarik Naitung 2023. ïa une la ïoh kem na ka jaka phet rieh jongu na jan Samanda.
Une u nongïalam ba la shah kem u dei u Balkarin Ch Marak uba dei ruh u nongïalam ka Garolad State Movement Committee. Une u riehtngen ha kawei ka ïing ha ka shnong Bansamgre kaba don ha ka surok rim Tura-Williamnagar. ïa une la ïoh kem da ki pulit ha ka jingleit khynra ïa katei ka iing mynta ka sngi ha ka por dang step. Ki pulit jongka West Garo Hills bad East Garo Hills ki la ïatrei lang ban ïoh kem ïa une u briew na katei ka jaka ba u phet rieh..
Ia uwei pat u nongïalam kane ka seng u Labenn Ch Marak la ïoh ban kem da ki pulit naduh ka 17 tarik u Nailar. Une u dei ruh u DSP ba rim jongka jylla.Kumba long mynta na ki lai ngut ki nongïalam ka ACHIK kiba la shah pynngat kyndon arngut la ïoh kem da ki pulit bad kaba dang phet rieh bad ka bym treh ban pyndem haduh mynta ka dei ka General Secretary kaba dei ruh ka nongiasaid aiñ ka Bernita Marak.
ïa kine baroh lai ngut ki nongïalam ka ACHIK la pyngnat ha ka kyndon aiñ Unlawful Activities Prevention Act bad kiba shah kem kin shah tohkit haduh 180 sngi ha ki pulit.
Kine baroh lai ngut ki la leit pan jamin lypa ruh na ka ïing bishar High Court ba kin ym shah kem hynrei ka ïing bishar ka la kyntait ïa ka jingpan jamin jongki bad dei na kata ka daw ki sa leit phet rieh bad ïoh kem pat uwei hadien uwei da ki pulit. U Balkarin Marak u dei u Co Chairman jongka Garoland State Movement Committee (GSMC) bad u Labenn u dei u nongaibuit jongka ACHIK.
Lah ban pynkynmaw ba ki ACHIK ki pynlong ka jingshah thngan ba khlem buh por halor ka Reservation Policy bad ki dawa ba u Myntri Rangbah u dei ban wan ïakren bad ki ha Mini Secretariat hynrei katba ka jingïakren ka dang ïaid la jia ka jingkulmar bad shah ther maw ka Secretariat kaba la wanrah ka jingmynsaw ïa bun ngut ki pulit. Ym tang katta la jia ruh ka jingshah thang bun tylli ki kali. Kane ka jingkulmar ka la neh kumba lai kynta ei ei. Dei hadien ba ki pulit ki la tohkit bniah bad lap ba kine ki dei kiba pynshit ïa ki paidbah ba sa jia kine ki jingkulmar ba sa pynngat kyndon a ki.