Hadien 35 snem thaw ka Sorkar ïa ka Advisory Board ban bishar ïa ka jingpynkheiñ aiñ ki nongkhaïi drok

Shillong, Naitung, 4: Ha ka sien banyngkong eh ka Sorkar Jylla ka la rai ban thaw da ka Advisory Board kaba don lai ngut ki dkhot ban shong bishar ïa ka jingïai pynkheiñ aiñ jong ki nongkhaïi drok na ka por sha ka por.
Ka jingthaw ïa ka Advisory Board ka long katkum ka Prevention of Illicit Traffic in Narcotics Drugs and Psychotropic Substance (PITNDPS) Act, 1988, kaba la don mynta la 35 snem tam.
Ki lai ngut ki dkhot jong ka Advisory Board ki kynthup ïa u Justice (Retd) Shivaji Pandey kum u chairman bad arngut kiwei pat ki kynthup ïa ki Senior Advocates jong ka Ingbishar Meghalaya High Court, kata, u Bah ND Chullai bad u Tshering Yangi kum ki dkhot.
“Da ka jingthaw ïa ka Advisory Board, ngi don ha ka lynti ban pyntreikam pura ïa ka PITNDPS Act nangne shakhmat,” ong u Myntri ka tnat Social Welfare u Bah Paul Lyngdoh ha ka jingïakren bad ki lad pathai khubor ha ka sngi Baar.
U la ong ba ki don bun ki jingduna ha ka NDPS Act, 1985 bad katto katne ki jingduna ki long ka jingïohlad jong ki nongleh be-aiñ ban lait na ki jingshah pynngat ha ki kti jong ka Aiñ bad namarkata ka aiñ ka tlot shaba palat.
U la ïathuh ba hadien ba la shong jingïalang arsien kynthih bad u Symbud Myntri Rangbah uba peit ïa ka tnat Kam Pohing u Bah Prestone Tynsong, la lah ban pynurlong ïa ka aiñ kaba la tip kum PITNDPS Act, 1988.
“Kane ka aiñ ka kham khlaiñ,” ong u Bah Paul bad bynrap ba kane ka Aiñ la ithuh ïa ka Jylla Meghalaya kum kawei na ki jaka kaba jyllei bha ka jingshalan be-aiñ ïa u drok.
Haba pynpaw ba ka PITNDPS Act ka treikam ïa ki nongkhaïi drok kiba ju ïai bteng ban khaii drok, u Myntri u la ong, “kane ka aiñ ka pynkupbor ban bat ïa kum kita ki briew haduh lai bnai khlem ka ka Advisory Board bad lada ka jingbat ïa ki briew kan palat ïa ka hynriew bnai ïa kane ka kam yn ban bishar da ka Advisory Board.”
U la ong ba ïa ka Advisory Board la pynkup bor ban kem ïa ki briew bad ka jingset along ka lah ban poi haduh shi snem hapoh ka Clause 7 jong ka Section 9 bad ar snem pule lang bad ka sub section 2 jong ka Section 2.
“Kane ka mut ba ka jingkem ïa kiba donkti kan sdang naduh lai bnai haduh 2 snem,” u la ong.
“Kino ki briew kiba shah kem hapoh kane ka hukum, bad yn pyllait ïa ki lyngba ka jingai jingmut jong ka Advisory Board bad ki lah ruh ban shah kem biang bad ban shah set along lada jia ba dang don kiba ujor pyrshah ïa kum kita ki briew,” u la ong.
Haba kylli, balei ka Sorkar Meghalaya kam shym la lah ban pyntreikam ïa ka PITNDPS Act la bun bun snem, u Bah Paul u la ong, “ngam lah ban batai ïa kaei kaba la jia ha ki snem kiba ladep. Mynta ngi hap ban ïaid shakkhmat. Ngi lap ba ka NDPS Act, 1985 ka don bun ki jingduna haba wat ka tnat Pulit ruh ka sngewkhia namarba ba ha ki jingpyrshang bun ki khep ban kem ïa kiba donkti hynrei ym lah satia namarkata, kiba donkti ki rung bad ki mih shaba ka Kashari.”
Katkum ka jingong jong u Myntri, ki lai tylli ki jaka khappud kiba jur bha ka jingshalan be-aiñ ïa u drok, ki long ka khappud India-Burma ha ka jylla Arunachal Pradesh, Mizoram bad Nagaland, kaba ar, ka dei ka khappud Indo-Bangladesh ha ka jylla Assam, Meghalaya bad West Bengal bad kaba lai ka dei ka khappud Indian-Bhutan ha ka jylla Arunachal Pradesh, Assam, Sikkim bad West Bengal.
“Nga kyrmen ba kiwei kiwei ki jylla ba la kdew da ka Aiñ kinl ïatreiang namarba kane kam dei shuh tang ka jingeh jong kawei ka jylla, hynrei ka la long ka jingeh jong ka thaiñ Shatei Lammihngi kaba sam shaduh Burma bad ter ter,” u la ong.