Hadien 16 sngi pynsangeh shwa ka NEHUSU bad KSU ïa ka jingshah thngan, yn bteng da ka shong kyllaiñ myngngor

By Mawphor Editor On Nov 21, 2024

Shillong, Naiwieng, 20: Ki samla pule jong ka skulbah North Eastern Hill University (NEHU) ha ka sngi Balang ki la rai ban pynsangeh shwa shipor ïa ka jingïakhih shah thngan ba khlem pud snig kaba la kynjoh mynta sha ka sngi kaba khathynriew hadien ka jingkyrpad na ki nonghikai bad ki doktor kiba peitngor ïa ka koit ka khiah jong ki samla pule baroh arphew saw kynta.
Ka NEHU Students’ Union (NEHUSU) ka la pynlong ïa ka jingïakhih shah thngan ba khlem pud sngi da ka jingkyrshan lang ka KSU NEHU Unit naduh ka 5 tarik mynta u bnai ban dawa hiar shuki ïa u Vice Chancellor u Prof. PS Shukla namar ka jingmynthi ïa ki mat jingdawa.
Watla ka NEHUSU ka la pynsangeh shwa ïa ka jingïakhih shah thngan, hynrei ka la pynbna ban bteng ïa ka jingïakhih da kaba pynlong sa ka jingïashong kyllaiñ mynngor kaba manla ka sngi naduh ka por 9:00 baje mynstep haduh ka por 5:00 baje janmiet.
U President ka NEHUSU u samla Sandy Sohtun u la maham ba ka jingïakhih kan dang bteng katba ka Ministry of Education kam pat lah ban pynhun ïa ki jingdawa, khamtam eh ban weng ïa u Vice-Chancellor u Prof Prabha Shankar Shukla.
“Ka jingshah thngan ka la jop 80 persen namarba ngi la don lang hapoh ka komiti ba la thung da ka skulbah NEHU. Ngi ngeit skhem ba yn sa lah ban weng ïa u Vice Chancellor u Prof. Shukla. Ka jingleh donbor jong u ka long shaba palat pud. “
“Ïa mynta ngin hap ban shongthait shwa namarba bun na ki dkhot jong ngi ka met ka phad kam long shuh bad katno ka jingsngewsih bad ka jingjaw ummat ha ka por mynmiet haba nga ïohi ïa ki dkhot kiba thiah hapdeng ka jingthylli jong ka kpoh ban shu dih sa tang da ka um. Kane ka jingïaleh kam kut tang hangne hynrei ngin bteng haduh ba ngin da ïoh ïa ka jingjop. Ka Ministry ka dei ban sngewthuh ba kane (ka skulbah NEHU) kam dei ka jaka theh ñiut ban shu wan bret ïa ki riew jaboh ha kane ka skulbah,” ong u President ka NEHUSU.
Haba pynpaw ka jingsngewkhia halor ka jinghiar kyrdan ka NEHU, u President ka NEHUSU u la ong, “mynshwa ngi ïohi ïa ka jingkiew shaphrang jong kane ka skulbah hynrei haba peit mynta ka long kum ka skulbah ba la tam kyntait. Ka NEHUSU bad ka KSU NEHU Unit ngi ieng skhem namarba ka ladei ka por ban wanrah jingkylla.”
“Katba ngim pat ïoh ïa ka jingjop, ngin ap ïa kata ka por. Lada ka Ministry of Education kam leh eiei, ngin sa shim da kawei ka sienjam,” u la ong.
Ka Ministry of Education ka Sorkar Pdeng, ka la thung ïa ka Enquiry Committee ba arngut ki dkhot ban tohkit ïa ki jingkynnoh pynïaid kam bakla bad jingbym nang pynïaid kam jong ki bor pynïaid ka NEHU hadien ba la ïoh ïa ka jingujor na ki samla pule kane ka skulbah.
U Vice Chancellor In-Charge u Prof N. Saha ruh u la thung ïa ka komiti ban tohkit ïa kine ki jingkynnoh.
Kum ban shu pynkynmaw, shwa ban jingpynlong ïa ka jingshah thngan ba khlem pud sngi ka NEHUSU bad ka KSU NEHU Unit ki la dawa ba dei ban wengkam ïa u Registrar u Omkar Singh bad ïa u Deputy Registrar (Academics) u Amit Gupta, ban wengkam ïa ki nonghikai bad ki nongtrei ba la shu thungkam be-aiñ bad ban thung ïa ki Pro Vice Chancellor ha Shillong bad Tura Campus.
Ban ïada ïa ka shuki lajong u Vice Chancellor u la pynhun ïa ki samla pule da kaba thung ïa ki arngut ki Pro Vice Chancellor, kata, ïa ka Prof. Sherwin M. Sungoh na ka Department of Education ka skulbah NEHU kum ka Pro Vice Chancellor jong ka skulbah NEHU Shillong Campus bad ïa ka Prof. Fameline K. Marak na ka Department of Garo ha ka Tura Campus, da kaba phah ïa ka shithi thungkam ha ka 13 tarik Naiwieng, 2024 lyngba ka WhatsAppp.
Kine ki arngut ki nonghikai, ki la kyntait mardor ïa kane ka shuki namarba ka jingthungkam ka dei lyngba ka WhatsAapp khlem ka jingmynjur lut na ki dkhot jong ka Executive Council.