Shillong, Rymphang, 29: U Myntri ka tnat Social Welfare ka Sorkar Jylla Bah Paul Lyngdoh ryngkat ka jingsakhi lang jong ka Myntri ka tnat Aiñ ka Dr. M Ampareen Lyngdoh ha ka sngi Palei ki la pyllait paidbah ïa ki “Ki kyndon Aiñ” jong ka POCSO Act, 2012 ba la pynkylla sha ka ktien Khasi ha ka jingïalang kaba la long ha Pinewood Hotel, Shillong.
Haba kren ha kane ka sngi, u Bah Paul Lyngdoh u la ong ba ngi la ïatreilang na ka bynta ka jingmyntoi jong ki parabriew bad ban lehkmen ïa ka jinglong khynnah, haba ngi peit shakhmat sha ki sngi jong ki samla, ki rangbah, hynrei ka aiom ksiar ha ka jingim ka dei ka jinglong khynnah.
U la ong ba ym baroh ki don ban sam ïa ka jingkmen, ka jingkmen ha ka jingim, dei na kata ka daw ka long kaba donkam ba kum ki nongthaw aiñ bad kum ki kynhun ki la ïatreilang ban ïakhun pyrshah ïa ki kam bymman kiba thombor ïa ka longryngieng jong ki khynnah rit.
U Bah Paul shuh shuh u la ong ba kane ka sngi, kan long ka sngi kaba jop namarba ha ka sien banyngkong eh hadien ba la pynmih ïa ki dak thok Khasi ha u snem 1841, mynta ka sngi ngi la lah ban ïoh ha ki dak thoh Khasi ïa ki kyndon jong ka Ain POCSO kaba la dap mynta shiphew snem.
U la ong ruh ba u sai sharak ba ngi la thang um long tang kum ka shab hynrei ai ba kito ki sharak rit kin meh ha ka dohnud jong ngi iwei pa iwei, khnang ba naduh ki nongthaw aiñ haduh ki nongpynkylla ktien, ki kmie ki kpa, ki nongïalam niam, ai ba ka jingshai jong ka sharak kan meh ha iwei pa iwei na ki khnang ba kin shim halade ïa ka jingkitkhlieh ban pynthikna ïa ka jingshngaiñ jong ki khynnah ha baroh kawei ka jylla Meghalaya.
U la ong ruh da ka jingkyrshan jong ka imlang ka sahlang, yn sa lah ban ïakhun pyrshah ïa kine ki kam bymman bad da ka jingwanrah ïa kane ka aiñ ha ka ktien Khasi kan pynthikna ba kan rung sha manla ki thliew iing jong ki shnong ki thaw, bad yn ym wat tang uwei ruh mynta uba lait na ki kynjri jong ka aiñ.
U la kyntu ïa baroh kiba mihkhmat ha kane ka jingïalang ban shim ïa ka jingsmai ba ngi don hangne da kawei ka jingmut ban pynim biang ïa ka imlang ka sahlang bad ban pynim biang ïa ka jingduh jingkyrmen.
Ha kane ka sngi, ka Meghalaya State Commission for Protection of Child Rights ka la pyllait paidbah ïa ka Almanak bad ka kaiphod halor ki POCSO Cases ha ki Kashari ka jylla Meghalaya.
