Hadien 10 bnai ba jah, lap sa tang ki shyieng, na ki kot ki sla lap jingpynshisha

Mawkyrwat, K’lyngkot, 31: Hadien ka jingjah jong uwei u samla uba kyrteng u Shanborlang L. Marshilong na ka shnong Mawlangwir, South West Khasi Hills District mynta la shiphew bnai eiei ha ka janmiet sngi Balang mynta ka taïew la lap noh ïa ka met jong u na kawei ka khlaw ha shnong Mawlangwir.
Lah ban pynkynmaw ba u Shanborlang L Marshilong u la jah na la ïing naduh ka 26 tarik, Lber, 2024 bad ki bahaing hasem ki la ujor da ka ejahar sha ki Pulit ha 30 tarik, Lber, 2024.
Ka kkhubor ba la ïoh na ki Pulit ka ïathuh, dei ha ka 29 mynta u bnai ba la ïoh jingtip lyngba ka telephone na ki nongshong shnong jong ka shnong Mawlangwir ba ki la ïohi ïa ki shyieng jong u briew bym lah ban ithuh shuh ha Photstew, Mawlangwir kaba jngai kumba 500 meter na surok Mawlangwir Mawkyrwat.
Ha ka jingtohkit la lap ïa ki shyieng bad la lap ruh ïa ka laisen ñiah kali, ka EPIC bad ka Aadhar card ba dei jong u Bah Shanborlang Lyngdoh Marshillong na Nonglang, South West Khasi Hills uba la jah rngai na ka jaka sah jong u.