Haba pyrta ieid Jaidbynriew sdang shwa na la ïing : Khyrwit u Bah Prestone ha ka jingïalang ha Nongkynrih

Shillong, Rymphang 09 : U State President ka NPP Meghalaya ba dei ruh u Symbud Myntri Rangbah ka Jylla, Bah Prestone Tynsong ha ka janmiet sngi Saitjaiñ u la ong ba na bynta kito kiba pyrta ieid jaidbynriew ha ka por elekshon nyngkong ki la dei shwa ban sdang na ka la ïing da kaba ieid shwa ïalade, ïa ka ïing ka sem, sumar bha ia ki khun, kurim bad ai ïa kaba bha tam na bynta jong ki.
Ïa kane u Bah Prestone u la kren ha ka jingïalang ïalap elekshon na bynta u kyrtong ka party na Langkyrdem – Laitkroh u Bah Rahbok Tynsong ha ka jingïalang kaba long ha Nongkynrih (Laitlyngkot).
“Nga ju kylli ïalade haba nga ieid jaidbynriew nangno ngan sdang. Hynrei naduh hyndai hynthai la ong haba ieid Jaidbynriew ieid shwa ïalade, ieid ïa ka ïing ka sem sumar bha ia ki khun, lok ba kin phuhmut phuhmat bad ai ïa ki ïa kaba bha tam,” u la ong.
Nangta u la ong ruh ba ka jingmut jong ka jinglong MLA ne MDC ka long ban pynbit pynbiang ïa ka constituency bad ban pyntikna ba ki nongshong shnong kin ïoh ïa ka hok kaba ki dei ban ïoh na ki nongmihkhmat.
Shuh shuh u ong ruh ba kadei ka kamram jong ki nongmihkhmat ban pyndap pynbiang ïa ka constituency khnang ba wat ki lynti syngkien kin dei kiba paka ba kin ym buh jingeh wat ban ïaid ha ka por mynmiet.
Kumta, u ong ba ki paidbah kim dei ban shah ïalam bakla ha kito kiba pyrta ieid jaidbynriew hynrei ban skhem ka nongrim lajong.
Ha kajuh ka por u ong ruh ba lada ki paidbah ki pynjop ïa u Bah Rahbok kin ïoh ïa ki lai tylli ki enjin treikam kiban peit ïa ka jingdonkam ki paidbah, kata da kaba pynsyriem ïa u Bah Rahbok kum ka enjin lai shaka, ïa u Bah Gavin ba dei u MLA ka thain kum ka enjin saw shaka bad ïalade u Symbud Myntri Rangbah kum ka enjin 10 shaka.
“Kine ki enjin 10 shaka, saw shaka bad ka enjin lai shaka kin ïaid lang sawdong pyllun ïa kane ka thaiñ,” u la ong.
Nangta u ong ruh ba ha kane ka juk social media la shu kynthoh kynnoh bad diang bad mon ïa ka NPP haduh ba ym sngewthuh sngewthaw shuh. U ong ba don ruh kiba kynnoh thik kumba ma u kum u Symbud Myntri Rangbah bad kumjuh u Myntri Rangbah ki la khur lut ïa ka spah ka phew bad lum thup ha khrum jingthiah.
“Ka jingkynnoh jong ki la sngew thik kumba ka khrum jingthiah ka la tuid lut da ka pisa hynrei lada ong pat ba kin ujor da ka ejahar (FIR) kine ki heh tyngam kim nud satia,” ong u Bah Prestone ha ka jingïalang.
Ha kane ka jingïalang la donlang ruh naduh u MLA ka thain Bah Gavin Mylliem, nangta u kyrtong ka party Bah Rahbok Tynsong bad ruh ki nongïalam jong ka NPP East Khasi Hills, ki samla bad kumjuh ki longkmie jong ka NPP.