Shillong, Nailur 17 : U Nongïalam ka Liang Pyrshah uba dei ruh u Myntri Rangbah ba rim ka jylla u Dr Mukul Sangma u la ong lada jur ka jingbamsap ha ka jylla khlem pep ki kynhun kieng atiar ne seng lehnoh kin mih beit.
U la kren ïa kane halor ka jingkylli kumno u sngew halor ka jingmih shylluit biang kawei ka kynhun kieng atiar ha ri lum Khasi bad Jaintia kaba la tip kum ka National Liberation Council of Nongkyndong.
“ Mynta phi ïohi haba ki samla kim ïoh kam ïoh jam lane haba ym plie lad plie lynti ïa ki ha ka jingbym banse khamtam haba ki ïohi ba la knieh lut nadong shadong da kita kiba don ha ka bor, la jur sa tang ka jingleh shilliang khmat bad ïa ki kam ki jam la pynïaid beit da kiba don ha ka shuki kumta kine keiñ kiba pynlong pynjia ïa kine kiei kiei baroh” ong u Dr Mukul.
Kine kiei kiei baroh ki pynpaw ïa kine kiba jia bad wei ba la mih biang kum kine ki kynhn kan shim por haduh 15-20 snem ban lah rat dyngkong ïa ki bad kumta kine ki snem kin shu bijai ei bad jur sa tang ki kynrum kynram bad ka jingkylli ka long mano pat ban pynkhuid ïa kine ki jaboh jabaiñ keiñ? kylli u Dr Mukul.
Kumta une u Myntri Rangbah ba rim ka jylla u la ong na ka bynta ka jingmyntoi jong ka jylla ka sorkar ka dei ban shim khia ban rat dyngkong ïa ki naduh ba sdang namar ka jylla ka la dep mad kiei kiba la jia ha ki snem kiba la leit noh.
