Ha u SP Fisheries phah tokit ki bor district ba ïap pathar ki dohkha ha wah Apha EJHD

Khliehriat, Nailur 23: Hadien ba la paw ha ki pathai khubor, ki bor district jong ka East Jaiñtia Hills District, lyngba u Deputy Commissioner, u Shivansh Awasthi, IAS mynta ka sngi ki la pyllait ïa kawei ka hukum (order) ha kaba ïadei bad ka jingiap pathar ki dohkha ha ka wah Apha kaba don ha shnong Umkiang East Jaiñtia Hills District bad la aiti ruh ïa kane ka kam ha u Superintendent of Fisheries East Jaiñtia Hills District, u bha Hubert Kharbuki ban wad bad ban tohkit halor kane bad ban pynpoi ruh ïa ka kaiphot sha u Deputy Commissioner ha ka 30 tarik mynta u bnai nailur 2023.
Kum ban shu phai dien, ka kynhun jong ki nongkhwai dohka, ka Eastern Narpuh Border Fishing Association (ENBFA) ka pynpaw ka sngew sih bad sngewkhia jur namar ka jingiap pathar ki dohka ha ka wah Apha ha kawei ka thwei ba ju khot ka Thwei Thlen, kaba don ha Umkiang, Narpuh East Jaiñtia Hills District, na ka liang ka Association ka suba jur ba ka jingiap ki dohka ka dei ka wan jingtheh dawai bih ki briew kiba na ka ri Bangladesh.
U President jong ka Eastern Narpuh Border Fishing Association , u bah Fin Surong, u la iathuh ba ma u lem bad ki dkhot tang shu ioh jingtip ïa kane ka jingiap pathar ki dohkha, mar mar dang step ha ka por kumba 6 baje mynstep jong ka 21 tarik mynta u bnai ki la hiar sha katei ka wah bad ki la sakhi ruh ïa kane ka jingiap ki dohka bad ka jingper ki dohka ha sla um bad ka la don ruh ka jingsma kaba la palat ha katei ka wah.
“Ka jingleh dusmon jong ki dkhar Bangla ka pynduh mynsiem ïa ki nongshong shnong jong ka thaiñ khamtam jong ki lai shnong, ka Umkiang, Pyrtakuna bad Kuliang kiba dang hap hapoh kane ka Association, na ka liang jong nga nga pynrem jur ïa ki riew shim kabu kiba la wan pynjot ïa kane ka wah bad pyniap ïa ki dohkha” la bynrap u bah Fin Surong.
U President ka Association, u kynthoh jur da kaba ong ba “imat kane ka lah ban dei ka jingleh dusmon ki briew kiba na ri Bangladesh, kiba don jingmut ban wan rung tuh sha ri India na ki jaka ba long khlaw, kiba hajan ka wah Apha, namar la ju lap bunsien ba ki nong Bangladesh ki ju wan rung tuh lyngba na ki khlaw bad jam sha shiliang ka wah Apha bad wan sha India, hynrei mynta ba ki la bun ki briew jong ka thaiñ kiba na jan na jngai ruh ki ju leit khwai dohkha sha katei ka wah imat ki ba na ri Bangladesh kim sngew iohlad shuh ban wan rung tuh kumta ki la leh da kine ki kam dusmon”
Na ka liang ka Eastern Narpuh Border Fishing Association, ka pynrem jur ïa kane ka jingwan leh dusmon ki briew kiba na bar bad ha kajuh ka por ka pynrem ruh ïa ki shipai Border Security Force ki bym shym la lah satia ban tehlakam ïa ka jingwan rung tuh ki briew kiba na ri Bangladesh.