Nongstoiñ, Risaw, 31: Ha ka jingialang kaba la tuid da ki spah ngut ki paitbah jong ka thaiñ Muliang, kiba dei ki nongkyrshan jong ka Congress, NPP, PDF bad kiwei kiwei kiba la wan ban pynïasoh sha ka Hill State People Democratic Party hynne ka sngi, na ka liang u bah Pangniang u la ong ba kumba ka jingdawa Khasi Jaiñtia State bad kumba ka National Federation of New State, ka la pdiang ïa ka HSPDP kum kawei na ki dkhot. Kumta, ka party ha u Nohprah mynta u snem kan pynïeng ïa ka lama hakhmat ka Ïing dorbar Parliament ryngkat bad ki khatphra tylli ki jylla kiba don hapoh ka shatri jong ka National Federation of New State.
Nalor kata u la ong ruh ba dang ha ka sngi saitjaiñ ba la dep ka HSPDP ryngkat bad ka GSMC ha ka jingïalang kaba la long ha Nongbah Tura, ki la ïamynjur lang ba na ka bynta ka Garoland State bad ka Khasi Jaiñtia State ba kin ïatreilang ban pynurlong bad ki la ïasmai ruh ba u pud u sam un long kumba la dep pruid dak bad kumba u long mynta.
Ha ka jingïalang kaba la pynlong da ka Rimuliang Zone ha ka shnong Nonglang West Khasi Hills mynta ka sngi ka 31 tarik Risaw, la pdiang burom ïa ki nongwan pyniasoh da u bah K.P.Pangñiang President rangbah ka party u ba dei ruh u kyrtong u ban ïakhun ïa ka election ha u snem ban wan. Ha katei ka sngi la pynlong ïa ka jingïalang pdiang ruh na ka bynta kiba bun ki longkmie kiba la wan ban pynïasoh kiba dei na Mawkapiah, Kyndongei bad Langpih area.
U bah K.P.Pangñiang haba ai jngkren ha katei ka jingïalang u la ong ba haduh mynta ki don palat lai hajar tylli ki longïing kiba duk bha hapoh ka Constituency. Hynrei ha ka por ba u la shah jied kum u nongmihkhmat u dang lah ban ai jingïarap tang kumba shi hajar tam. Ha kajuh ka por u la ong ba ha kine ki san snem mynta ka party ka don lang bad ka sorkar, hynrei kam shym la dawa ba ka sorkar kan ai skhim, hynrei ba kan pynbeit noh ïa u pud u sam, namar kane ka dei ka sur ba ka party ka la dawa la palat sanphew snem.
