Ha u Lber 2026 yn pyndep noh ka jingtei ïa ki artylli ki Smart City Projek ha Mawkhar, ong ka SSCL

Shillong, Rymphang 10: Ka Dorbar Shnong Mawkhar ha ka sngi nyngkong ka la khot ïa ka jingïalang bishar kam ha kaba bad ka jingsuki ka jingpyntrei ïa ki artylli ki Shillong Smart City kiba dang hab hapoh ka jingpeit jong kane ka Dorbar shnong.
Kine ki artylli ki Shillong Smart City ki dei ka jingtei ïa ka ïing ophis DI ne DESO bad kawei pat kadei ka jaka pynïeng kali kaba ha Mawkhar. Ha kane ka jingïalang bishar kam la pynïaid da u Assistant Rangbah Shnong u Bah Ransom Sutnga, u Bah G. E. M Kharpuri Secretary Mawkhar Dorbar Shnong, u Priyankar Pradhan Support Engineer IPE Global Consultant, u Aditya Jain, G Nongrem, W Massar Peter Shadap kiba dei ki Contractor, Bah R A Kharmalki, Bah L Najiar, T Lymba bad K Kharmih kiba dei ki Rangbah Dong, u Arush Sod Support Engineer IPE, u S H Rizvi Deputy Team Leader.
Ha kane ka jingïalang ka Dorbar Shnong ka la pan ka jingpynshai halor ka jingbuh por ban pyndep ïa kine ki projek ba khmih bad pyntrei da ka Shillong Smart City Ltd (SSCL) bad kane kadei ka sien kaba ar ba la pynlong ïa kane ka jingïalang bishar kam.
Haba kren bad u Mawphor u Assistant Rangbah Shnong u Bah Ransom Sutnga u la ong ba ha ka sien kaba nyngkong ïa kane ka jingïalang la pynlong ha u 21 bnai Ïaïong jong u snem 2023 bad ha kaba ka por ban pyndep ïa kine ki projek ka dei 24 bnai kaba la sdang ban pyntrei naduh u Kyllalyngkot 2023.
“Ka jingkhot biang ïa kane ka jingbishar kam kadei namarba bun na ki nongshong shnong ki la thnum, ki la ud halor ka jingslem ban pyndep ïa kine ki projek, hynrei hadien ba la ïakren sani bha na ka liang ka Shillong Smart City Ltd ka la ïathuh ba kan pyndep noh ïa kine ki jingtei hapoh u bnai Lber 2026 bad kin ïaleh ruh ban pyndep kloi katba lah ha ka shwa ka por ba la buh,” ong u Assistant Rangbah Shnong.
U la ong ruh ba ha kine snem ba la leit ki la don ki jingthut hangne hangtai hynrei ka dorbar shnong ka la shimkhia khnang ba kine ki projek yn lah ban pyndep kloi ki ban long ka jingmyntoi ïa kane ka thaiñ Mawkhar.
“Kumba la ïohsngew na kine kiba la wan mihkhmat napoh ka kompeni ki la ai ka khubor kaba bha naba ki la ong ba hapoh u bnai Lber 2026 kin pyndep noh ïa kine ki projek, ki la batai ruh ba ka jingtei hapoh ka jaka ïeng kali ne Mawkhar Parking Lot la sdang pynïeng ïa ki païa nongrim bad ym ba kane ruh kan dep kloi kumba long ka ophis DI. Ki la ïathuh ba ha kane ka jaka ïeng kali hapoh 2 spah tylli ki kali kin ïoh ïeng, nangta ka jingtei ïa ki paiñkhana kiba bha katkum ka juk mynta, nangta ki dukan bad kiwei, kumjuh ruh ha DI kin don bun ki lad ki lynti nalor ka jingdon kumba 3 mala kin ruh hapoh kiwei ki lad jingmyntoi bad la khmih lynti ba kine ki artylli ki projek yn ïoh plie noh ha ka por kaba la buh,” ong u Assistant Rangbah Shnong.
Ha ka jingleit jurip hadien ba la dep ka jingïalang la shem ba ka jingtei ïa ka ophis DI ka la long kaba biang bha bad kaba iskhem bad kumjuh ruh ka Mawkhar Parking Lot kaba la sdang ban pynïeng ïa ki païa mawnongrim haba na ka liang ki nongïalam shnong ki la pynpaw ka jingsngewhun ban ïohi ba ka jingpyntrei ïa kane ka kam ka la dang ïaid shakhmat bad ym slem shuh ba kin lah ban dep noh bad ban ïoh plie noh ïa ki.