Nongstoiñ, Nohprah, 18: Hadien ba ka National Federation of New State ka la pynkut ïa jingïakhih ba jai jai kaba la pynlong ha madan Jantarmantar New Delhi ha ka 15 tarik, ha kaba la leit ban ïashim bynta da ki kynhun kiba kynthup ïa GSMC, HSPDP, Bodo land, Gurkha land, Tripra Land, Kuki state, Budelkhand, Purbanchal hapoh ka jingïalam jong u Professor Munish Tamang kum u President, ki nongialam ki la ïoh ruh ban aiti ïa ka dorkhas sha u Amit Shah Myntri kam pohïing ka ri.
Ha katei ka dorkhas ba la ïasoi lang da ki hynñiew ngut ki nongïalam, kata u Professor Munsih Tamang President, Nikman Marak Vice President StalynIngti Secretary, Bah K.P.Pangñiang President HSPDP, Khrishna Kanta Jamatia Vice President IPFT, Khupbailu Vice President Kuki State Demand Committee, Khersingh Teron Chairman JACAS, ka NFNS ka la kdew shai ba ka jingdawa ïa ki jylla ba thymmai, ka long katkum ki mat ba la kdew ha ka riti synshar ka ri, “Demand for creation of new States in India as per provision of the Indian Constitution”.
Shuh shuh, ha katei ka dorkhas la kdew shai ruh ba katei ka jingdawa kam dei shuh kaba dang thymmai, hynrei ka dei ka jingdawa kaba la slem bha kaba la pynshong nongrim kat kum ka riti synshar ka ri. Nalor kata la pynkynmaw ruh sha ka sorkar India ba ka jingthaw ïa ki jylla ba thymmai, ka long katkum ka ktien ka thylliej bad ki jaitbynriew kiba shnong ha kitei ki jaka kan ïarap shibun ban kyntiew bad pynkhlaiñ shuh shuh ïa ka synshar paitbah ha ka ri.
