Ha rynsan ïalap elekshon kular ka kong Macdalyne ban dang shakri kham bha ha Umsning

Nongpoh, Rymphang 12: Ka kong Macdalyne S Mawlong kaba dei ka kyrtong jong ka NPP ha kane ka elekshon MDC na Umsning Constituency kala pan ka jingkyrshan naki paidbah haka jingïalang kaba la long mynta ka sngi ha Umsning Auditorium ha kaba kala kular ruh ban dang ai ka jingshakri kaba khambha ha Umsning Constituency lada ki paidbah kin pynjop biang ha kane ka kynti ba mynta namar ka dang don shibun ki jingangnud ban dang bteng ka jingshakri naka bynta ki paidbah ka thaiñ Umsning bad ka Ri Khasi hi baroh kawei lyngba ka District Council.
Ka la ong ruh haka jingïalang paidbah ba kane kam dei ka rynsan ïa beiñ briew hynrei ka rynsan ban ïathir ïatai kumno ban dang pynjanai ïaka rukom treikam hapoh District Council, kumba ki paidbah kila sakhi ïaki kam ba khraw ba EC hapoh ka jingïalam ka NPP kala leh ha District Council.
“Bun ki paidbah ki kynnoh kynthoh lai phew jait ba ka kong Mac kala rah ïaka skhim na kawei ka Constituency sha kawei pat, ngan ong ïaphi ba kine baroh ki dei tang ki ñia elekshon namar ym lah ban leh kumta, kumba ki don ki kyndon aiñ, bad lada kita kiba wohdong bad kiba wad daw ki kwah ban lap ïaka jingshisha ki dei ban wad da ka RTI, namar ngam tieng lada kiwei ki kren beiñ, ngan ïaid haka nongrim kaba skhem ban shakri ïaki paidbah” la ong ka kong Macdalyne.
Kala ong ruh ba haki 6 snem bala ïalam ïaka EC ha District Council, la lah ban wanrah shibun ki aiñ kiba skhem kiba khlaiñ naka bynta ka jaitbynriew, namar ka District Council ka dei ka kynroh ba khatduh bad ka tiehbah jong ka jaitbynriew bad kaba kham hakhmat eh ka dei ka jinglong aiñ noh ka aiñ bat khyndew ne ka Land Act ban pynskhem ïaka jinglong trai ïaka khyndew ka shyiap.
Namarkata ka kong Mac kala pan ka jingkyrshan naki paidbah ban ïatreilang biang ha kane ka kynti ba mynta da kaba ong ba ngi tip shai ba ka sorkar NPP ka dei ka sorkar u paidbah bad kum ka jaitbynriew hi ka dang donkam shibun kiei kiei, la kiwei ki beiñ ki khoh ngi ngeit b akita kiba beiñ kin sa wan lang sha ka iing jong ka NPP namar haka party NPP ym don ba khraw ne ba rit kala bynrap.
Kum ka jingpynshngaiñ ha katei ka sngi la wan ruh ban sakhi da ka jingdonlang u Bah Prestone Tynsong President ka NPP haka jylla ryngkat kiwei kiwei ki nongïalam ba hakhmat jong ka party.
Haba kren ha katei ka sngi naka liang u Bah Prestone Tynsong u la ong ba ka ka party NPP ka dei ka party kaba shah lynthem maw bad shah kren beiñ laiphew jait lai phew rukom naduh ki por ba ka ioh ban synshar ïaka jylla haduh mynta bad kaba phylla ka long ba katba dang kren beiñ ki briew katta dang bun kiba wan pynïasoh bad ka NPP.
U la ong ruh ba bun ki briew ki kynnoh ba u Bah Prestone u dei u ba isih jaitbynriew hynrei ngan ban pynriewspah bad ban pynbhabriew ïaka jaitbynriew ngan rah 10 tylli ki bowl ruh nga nud, namar ki paidbah kim iohi naduh u snem 2018 haduh u snem 2025 katno klur u Conrad Sangma bad u Bah Prestone Tynsong kila wanrah naka bynta ka jylla.
Halor ka jingkynnoh kiba bun ba ka NPP ka dei ka BJP haka jylla Meghalaya naka liang u Bah Prestone Tynsong u la pynshai ba ha u snem 2018 naduh ba shimti ïaka sorkar tang kawei ka nongrim ba ka NPP ka don kata ka long ban shakri hok ïaka jylla naduh ka por bala rem noh ka Congress haka bor ha nongbah Delhi, ka wan ka NDA bad ngi la shim ruh ka rai haka jylla ban ïatreilang kum shi paralok takadaw tuid ki projek bad ki kam pynroi bapher bapher shaka jylla Meghalaya haka jingïalang paralok bad ka BJP namar ngi don ka jingmynjur ban ïatreilang bad ka sorkar NDA tang naka bynta ka roi ka par bad ki project bapher bapher ba ki paidbah ka jylla ki donkam.
U Bah Prestone Tynsong u la ong ruh ba lada ki paidbah kin dang ai ka jingjop ha kane ka kynti ba mynta yn dang lah shuh shuh ban pynskhem ïaka pateng ban wan, ban pynkhlaiñ ïaki Hima bad ki nongïalam khamtam ïaka District Council kaba dei ka thymmei bah jong ka jaitbynriew.