Jowai, Nailar 18: U Deputy Commissioner ka West Jaiñtia Hills District u bah Garod LSN Dykes IAS ha ryngkat u ma Roskil Challam, SDO Electrical Division PHE, ma Khroo Lamsalanki Pariat President ka ‘Khooid Ya Ka Wah Myntdu’, ma Alan Niangti President Synjuk Waheh Chnong Jowai lem bad kiwei de kila pynlong ka jingleit jurip ïa ka jaka tan umbam (Pump House) ka tnad PHE (Electrical) kaba don ha urkhla bad kumjuh ïa ki jaka pyllang um kum ha Khimusniang, Mooliksoo bad Dongmihsngi.
Ka jingthmu jong kane ka jingleit jurip ka long shi bynta ban lap ïa ka jingshisha la ka long kaba biang ne ym ka rukom pynkhuid ïa ka umbam ha kitei ki jaka pyllang umbam jong ka PHE, hashwa ban pynpoi sha ki paidbah nongshong shnong ka sor Jowai.
Mynta ka sngi na ka liang u Deputy Commissioner, Garod LSN Dykes, IAS ula sakhi dala ki jong ki khmat ïa ka jaka pyllang umbam ka PHE (Electrical) kaba don ha urkhla, Khimusniang hadien ba la dep pynkhuid bha ïa ka bad kane kala pyndap ïa ki da ka jingsngewkmen ban ïohi ïa ka um kaba khuid, ula kyntu ruh ïa ki bor ba dei peit hashwa ban sam umbam sha ki paidbah dei ban pynkhuid bha ïa ka.
U ma Khroo Lamsalanki Pariat, President KYKWM ha ka kren uba pynpaw ka jingaikhublei ïa u Deputy Commissioner, Garod LSN Dykes, IAS uba la shimkhia ïa ka jingud jingnam jong ka seng na ka por sha ka por ha kaba ïadei bad ka Wah Myntdu kaba dei ka nongbsa umbam.
Na ka liang ka seng ka buh ka jingkyrpad ïa ka tnad PHE (Electrical) Division ba kan shimkhia man ka por ban pynkhuid ïa baroh ki jaka pyllang umbam da kaba niat rong bad ban pyntip ïa ka sngi pynkhuid sha ki paidbah.
Ula khot ruh ïa ki paidbah nongshong shnong bad ki tnad sorkar ba kin don ka jingkitkhlieh na ka bynta ka jingbha jingmiat jong ka Wah Myntdu, da kaba kyntu ba kiar katba lah na ka jingbret pathar ïa ki ñiut ki ñier sha ki talawiar jong ka Wah Myntdu.