Nongstoiñ, Nailar 18: Ka Meghalaya State Legal Services Authority, Shillong ha ryngkat ka jingïasnohkti lang jong ka Social Welfare Department, ka Health Department, ka C&RD Block bad ka District Legal Services Authority, Nongstoiñ kin pynlong ïa ka Health Camp cum Awareness Programme shaphang ka NALSA scheme bad Government Welfare Scheme halor ka phang “Bridging the Gap” ha ka 20 tarik mynta u bnai naduh ka por 10 baje mynstep ha St John Bosco Higher Secondary School, ha Nongkhroh-Rambrai.
Ka jingthmu jong kane ka programme ka long ban pynsngewthuh ïa ki paidbah shaphang ki scheme jong ka NALSA bad ki scheme bapher bapher jong baroh ki tnad Sorkar kiba don hapoh ka District, la ka long shaphang ka hok ki khynnah, ka jingïada ïa ki nongshong shnong ban pynsngewthuh ïa ka jingdon ka hok ban shakri ïa ki briew kiba duna ka ïoh ka kot ha ka imlang sah lang bad ban pyntikna ba ki lad ki lynti ban ïoh ïa ka hok bad jingshisha ïa baroh la ka long ha ka ïoh ka kot ne kano kano ka bynta. Ka thmu ruh ban pynsngewthuh ïa ka koit ka khiah ha kaba ïadei bad ki khynnah ba dang khie dang san, ki kynthei ba armet ki lad jingïada bad kiwei kiwei ki jingkoit jingkhiah la ka long ïa ki shynrang ne kynthei.
Ha kane ka proramme yn wan ban pynsngewthuh da ki resource person kiba kynthup ïa I Judge jong ka High Court, Shillong Hon’ble Justice W Diengdoh, kong B Laitmon halor ka POSCO Act bad NALSA Scheme, 2015, kong AD Wanniang halor ka EIPAS Scheme, 2015, bah W Shabong DCPO halor ka Child Rights and Protections, Dr G Kharpuri MHO Rambrai PHC halor ka teenage pregnancies, bah L Lyngdoh Asst. Director (CNCP) Social Welfare Department, bah T Diengngan BDO Nongstoiñ, SP WKH bah HG Lyngdoh, kong AM Pariat Chief Judicial Majistrate cum Secretary District Legal Services Authority, Nongstoiñ nalor kiwei kiwei pat.
