Shillong, Naitung 30 : Kum ka dak ban sakhi ïa ka jingrakhe ïa ka lyngkhuh snem ba lai jongka National Education Policy 2020 u Myntri Rangbaah duh ka ri u Narendra Modi u la plie paidbah ruh ïa ka Akhil Bharatiya Shisha Samagam ha Bharat Madapam, Praggati Maidan ha nongbah Delhi.
Hangne ha nongbah Shillong ka tnad pule puthi jongka jylla ka la pynlong ïa ka prokram da kaba pyni Live Streaming ïa ka prokram jongu Myntri Rangbah ha Raj Bhavan, Shillong ha ka jingïadon lang u Lat ka jylla u Phagu Chauhan, u Myntri ka tnad pule puthi u Rakkam A Sangma, u Advisor ka tnad pule puthi u bah H.M Shangpliang, ki ophisar, ki heh shipai bad ki khynnah skul na ki skul bapher bapher.
Kum shi bynta jongka prokram u Lat ka jylla u la leit jngoh ïa ka exhibition halor ka NEP 2020 kaba pyni ïa ka jingtrei ki khynnah skul bad ka DERT.
Ha ka jingplie ïa kane ka prokram ha nongbah Delhi u Myntri Rangbah duh ula pyllait ruh ïa ka bynta ba nyngkong jongka fund jongka PM SHRI Scheme. Lyngba kine ki skul kin ai jinghikai ïa ki khynnah skul ha kiba bun ki bynta bad kin ai jinghikai ruh kumno ba kin long ka lawei ki ban trei ïa ka imlang ka sahlang bad ka ri kumba la prat lynti ha ka NEP 2020.
Kane ka prokram ba arsngi ba la pynlong da ka Ministry of Education bad ka Ministry of Skill Development & Entrepreneurship ka long halor ka thong ban ailad ïa ki riew khraw jabieng, ki riew stad, ki nongthaw policy, ki nonghikai, ki khynnah skul bapher bapher ba kin ïoh ban ïamir jingmut sani bha ha kaba ïadei bad ka jingpyntreikam ïa ka NEP 2020 bad kumno ban dang ïamir jingmut ban dang pynïaid shaphrang ïa kane ka kam.
