Ha Nongstoiñ ngim donkam NPP ne Party sdien bos, sawa ka sur ki paidbah

Nongstoiñ, Rymphang 12: Ha ka sien kaba nyngkong eh u Doctor Juristman Ïawphnïaw kum u kyrtong ka Voice of the People Party na Nongstoiñ, u la ieng rynsan hakhmat iew Nongstoiñ ban pynpaw ïalade sha ka pyrthei jong ka politik bad ban pynshai paidbah ïa ki mat ba kongsan shwa ka sngi thep vote ka ban long ha ka 21 tarik mynta u bnai.
Watla u dang shen eh sha ka jylli ka politik lehse tang da ki khyndiat bnai, hynrei u ne u samla u la pynpaw ïa ka jingshlur ban ieng bad ai jingkren kaba skhem hakhmat ki paidbah, ki nongleit nongwan bad ki nongiew nonghat jong ka sor Nongstoiñ.
Ha ka jingïalang paidbah jong ka VPP kaba la long ha ka sngi balang, u Doctor Juristman Ïawphniaw, u la ong ba naduh ba dang rit u don ïa ka jingkwah ban shakri paidbah, kata la ka long ha kano kano ka lynti ruh. U la ju phohsniew ban leh ei ei khamtam halor ka jingbam sap kaba la shyrkhei ha ka Jylla, wat naduh ka por ba u dang long tang u samla pule. Hynrei, um shym poi pyrkhat ba u Blei u la btin lynti bad mynta u la long u kyrtong jong ka party kaba ki paidbah ki ieit eh, ka Voice of the Peoples Party.
U Doctor u la kren ruh halor ka jingdonkam ki paidbah ban phai bad ban long kiba ïohi jngai na ka bynta ka pateng ka ban wan. U la ong ba lada ïa phai naduh ka pule puthi, ka koit ka khiah, ki lad kamai bad khamtam eh ka ïoh kam ïoh jam ki samla, ka thaiñ Nongstoiñ bad ka Jylla hi ka la nang hiar arsut. Kiba kamai kiba shong dukan bad kiwei kiwei kiba trei bylla sngi, ki ud ki nam na ka por sha ka por. Kat nang mih ki sngi kiba duk ki la nang duk arshah bad kiba riewspah kiba don ha syndah bad kita ki nongsynshar, ki la nang riewspah.
U la ong ba ka la dei ka por ki ba ki paidbah kin pynshong nongrim ïa kiei kiei baroh bad ban ailad noh ïa ka Voice of the Peoples Party, ba kan ïoh ban synshar bad ban pynbeit ïa kine ki jingeh, khamtam ban rat ïa ka jingduk, ka jingleh donbor bad ka jingleh shilliang khmat.
U la wer sha baroh ki nongshong shnong ka Nongstoiñ Constituency, ba kin long kiba ïa tylli kawei ka sur na ka bynta ban wanrah pat sa shisien ïa ka nam ka burom ka jaidbynriew, kata da kaba kin ai ka jingkyrshan ïa ka VPP kaba long satang ma ka hi ka lad ka lynti lyngba ki bor synshar, ban pynim ban tei pat bad ban pynkylla dur ïa ka Bri u Hynñiewtrep.
Na ka liang u Bah Thingdar Lyngdoh Lyngkhoi, u ba long ruh u nongïalam ba hakhmat ka party HSPDP Nongstoiñ bad u nongïaleh Hill State, haba kren ha ka jingïalang u la ong ba u bynnud bad jaw ummat rangbah ban iehnoh noh ïa ka seng HSPDP, ka seng kaba u la im mynta da ki bun phew snem naduh ka por ba la seng ha ka jingialam u Maieirt Hoping.
Hynrei, u la ong ba um banse ban iehnoh namar naduh ba u Maieit Hoping u la khlad noh, ki nongrim jong ka HSPDP ki jah noh na kine ki nongïalam kiba don mynta. U la ong ba ha ka por u Maieit Hoping u sngew skhem, hynrei mynta la kylla khongpong, namar kumba long mynta ki nongkitkam ki sah satang ka nam, katba ki kam kim ïahap shuh satia.
U la ong ba u la rung noh sha kane ka party thymmai, namar ba u ïohi ïa ka nongrim ka VPP kaba long kajuh katkum ki nongrim jong ka HSPDP ba la ïalam da u Maieit Hoping, kaba la pynlong ïa u ban rung noh sha kane ka party, kaba kumba long mynta ka dei satang ma ka hi ka lad ka lynti ban im ki pateng ban wan.
U la kynthoh ruh ïa ka kyrtong ka HSPDP Nongstoiñ ka kong Badariti Lyngdoh Nonglait, kaba kup ïa ka dur jong ka party hynrei kumba long mynta ka dei tang ka Vice Chairman jong ka Law Commission jong ka sorkar NPP. Kumno kam lehraiñ ban pyndonkam ïa ka kyrteng Maieit Hoping, haba ïalade ka dei tang ka nongtrei jong ka sorkar NPP ha ka Jylla. U la ong ba ki paidbah ki dei ban long kiba stad bad ban da peit bha ïa kine ki briew, kiba shu kylla dur bula mynta por ïaleh elekshon katba ki long pat ki shakri jong ka sorkar NPP.
U la ther ruh ïa u President ka party HSPDP u bah K.P Pangniang u ba na ka por sha ka por, u kren kumba ieit jaidbynriew eh khamtam ha ka por elekshon. Hynrei kumba long pat baroh shikatta ki kam ki long da khongpong. U la ong ba kiba bun mynta ha ka HSPDP kaba u maieit u la seng halor ka nongrim ka hok bad jingshisha, mynta ki la kylla suri kup snieh langbrot.
U la ong ba kim lehraiñ shuh mynta ban leit ïalap ekelshon kylleng da kaba pyndonkam ïa ka burom jong u Maieit Hoping. Ki leit ban thad pynjah burom ïalade bad pynbiej katba mon ïa ki paidbah. Hynrei ki paidbah kim dei shuh kiba biej bad ka la dei ka por ban da peit bha bad husiar, namar kine ki juh ki briew kiba pynpaw ïa u maieit Hoping, ki dei ki kijuh ki briew kiba don ha ka sorkar NPP bad ba dang ap katba ka sorkar NPP ka ai ha ki ïa ki kam long heh hapoh jong ka.
U la ong ba ki paidbah Nongstoiñ ki dei ban sngewthuh ba lait na ka VPP, baroh ki dei satang ki party kiba don ha ka sorkar NPP suda, lane kita ki party sdien bos. Lada jied ïa ka HSPDP lane kiwei pat ki party ka long kajuh hi kumba jied ïa ka NPP ym don jingpher ei ei. Na kata ka daw u la ong ba ki paidbah Nongstoiñ kum ki briew ba la shai ka rukom pyrkhat, ki sngewthuh ba ha Nongstoiñ hi ym donkam NPP lane party sdien bos, ha u Prah beit na ka bynta ka pateng ban wan bad ka lawei ka jaidbynriew.