Nongpoh, Nailur 14: Ki nongïalam ka Ri-Bhoi Youth Federation Umden Circle kila pynpaw ka jingsngewkhia kaba jur ïaka jingud jingnam jong ki paidbah bad halor shibun ki jingduna haka rukom ai jingshakri ka Umden PHC khamtam ka jingdon tang kawei ka kamra thiah nongpang jong ki shynrang (Male Ward), hynrei la pynthiah lang ïaki kynthei bad ki khyllung khynnah ha katei ka juh ka kamra.
Naka liang ka seng mynta ka sngi kala pynlong ruh ka jingjurip ïa katei ka jaka ai jingsumar jong ka sorkar bad lap shibun ki jingdkoh treikam ban ai jingshakri sha ki paidbah bad ïakynduh ruh ïaki Doctor ban ïakren halor ka jingeh bad ki jingdonkam jong katei ka jaka ai jingsumar.
Haba kren sha ki lad pathai khubor, u samla Founder Syiem, President ka RBYF Umden Circle u la pynpaw ïaka jingsngewkhia halor katei ka jingpynthiah lang ïaki nongpang ha kajuh ka kamra ha kaba naka liang ka seng ka la kyrpad ïaki bor ba dei peit ba kin nym khleh lang ïaki nongpang ha kajuh ka kamra naduh ki kynthei, shynrang bad ki khyllung.
Naka liang ka seng kala pynsngew ruh hakhmat ki doctor ba dei peit halor ka jingbym don ka jaka leit shabar paidbah, kaba la wanrah shibun ka jingeh ïaki paidbah bad haka juh ka por ka jingbym treikam ka kali kit nongpang 108 haka por ba ki paidbah ki donkam kyrkieh ban rah bad kit ïaki nongpang bad kyrpad ruh ïaki bor ba dei peit ba kin shimkhia ïa kitei ki jingeh jong ki paidbah khamtam ba katei ka jaka ai jingsumar kan lah ban ai ka jingshakri ba paka sha ki paidbah.
