Shillong, Nohprah 12: U Chief Secretary jong ka jylla u Bah DP Wahlang u la ong ba lada peit na kaei kaba mih na pule puthi bad ka jingdon ki kam na bynta kiba la pyndep jingpule kawei na ki laiñ pule kaban kham bun kiba dawa kan dei kiba pyndep ïa ka jingpule ha ki laiñ commerce.
Haba kren kum u kongsan ha ka jingplie ïa ka kamra ba dang shu pynkha thymmai jong ka Jaïaw Presbyterian Higher Secondary School, Jaïaw (JPHSS), U bah DP Wahlang u la ai jingmut ïa ka skul ba kan pylleit jingmut ban ai jingshakri ïa ki samla ha ki laiñ commerce bad marketing namar kine ki laiñ pule ki dei kiba ha ki kam kompeni ne ban seng kam lajong ki dei kiba donkam bha bad kiba ïadei ruh kat kum ka jingkwah jong ka kam ba kin trei.
“Kumba ka laiñ science ka long kaba donkam kane ka laiñ commerce lei ka long kaba donkam bha namar ki jingpule jong ki kin dei beit ha ka laiñ ka ïew ka hat bad ka die ka thied, ka seng kam lajong namar lada phi pynleit jingmut ban ai jinghikai tang ba kin ïoh kam sorkar ka long kaba la bakla lupa namar wat tang na bynta san tylli ki kam kiba lait ruh da ki bun bun hajar ngut ki samla kiba wan aplai, namarkata kaba donkam hi ka long ha ka seng kam lajong bad ban ai jinghikai ruh ïa ki samla halor kane ka bynta,” u la ong.
Ha kane ka sngi u Bah DP Wahlang u la khap ribon ïa ka kamra ba dang shu dep shna bad ka jingplie ïa u maw sahkynmaw jong ka jingïoh kamra klas ba thymmai kane ka skul ha ka jingsynran lang u Rev WC Khongwir, Rev D Sun, u Principal ka skul u Babu S Mawblei ha ryngkat ka jingïadonlang ruh ki nonghikai, ki samla pule bad ki nongshah khot sngewbha.
