Shillong, Naiwieng, 11: Ka kynhun Search and Rescue Team (SRT) ka tnat treikam jong ka Fire and Emergency Services (F&ES) ka la ai jinghikai ïa ki dkhot ha ka por bym don kino kino ki jingjia basngewsih ha kylleng ka jylla.
Dang ha kine ki khyndiat bnai, ki dhot ka SRT ki ju leit ai jingïarap ha kylleng ka jylla, kata, ha Sor bad ha nongkyndong haba ki paidbah nongshong shnong ki ïakynduh ïa kino kino ki khep ba ki donkam ïa ki jingïarap ïa ki kyrkieh.
Ha kine ki khyndiat bnai ba la leit noh kane ka kynhun ka la ïarap ïa ki lanot shlei um, ki lanot kiba mad ka jingtwa khyndew, kiba la ngam jyllop, ki lanot kiba ïakynduh ïa ki jingjia hap kali bad ngam um ban wad ïa ki briew kiba la shah rong ha ka um da ki sngi, ki taiew bad ki bnai.
Dang ha kine ki khyndiat sngi, ka SRT ka la pynlut por ban ai jinghikai ïa ki dkhot kumno ba kin pyntbit shuh shuh ïalade ha ka jingkilan met ha pung Umïam khnang ba kin nang lah ban pynjanai shuh shuh ban ai jingshakri sha ki paidbah nongshong shnong jong ka jylla baroh kawei.
