Ha Kharsati Park kyrñiom ktieh ki kali AHOR, da ki hajar ngut sakhi ki nongpeit kai ha ka sngi kut

Nongpoh, Risaw, 13: Ka lympung iakop pynher kali ha ki surok ktieh bad ki khohruh khohram ba la tip kum ka 6th AHOR 4X4 Off Road Challenge 2024 ba la pynlong da ka Adventurous Hynniewtrep Off Roaders (AHOR) ka la poi noh sha kaba kut hynnin ka sngi Saitjaiñ ha Kharsati Park, Umtham ha Ri Bhoi hadien ba ki nongñiah kali na kylleng ka Ri Khasi bad Jaiñtia bad nabar jylla ki la wan ban shim bynta shitrhem ha katei ka jingïakop naduh ki kynthei da kaba kyrñiom ïa ki ktieh bad surok khohruh khohram.
Kum ban shu pynpaw, katei ka lympung ïakop ñiah kali ka la sdang naduh ka 10 tarik, Risaw bad pynkut ha ka 12 tarik Risaw, bad da ki hajar ngut ki paidbah nongpeitkai ki la wan ban sakhi ha katei ka sngi pynkut jong katei ka jingïakop ba la pynïakhun ha ki 3 tylli ki kyrdan kata ka Stock Category, Modified Category bad Pro Modified Category.
Ïa katei ka lympung la wan ban pyndap pyrda da u Bah MB Tongper ADC ka Ri-Bhoi kum u kongsan, ha ka jingdonlang u Bah Damian Umdor President ka AHOR, Bah Fedinand Jahrin Secretary, Bah Ferdinald Kharkamni Vice Preisdent bad kiwei kiwei.
Haba kren ha katei ka sngi u Bah MB Tongper kum u kongsan u la ai ka jingïaroh ïa ka kynhun AHOR kaba ju pynlong ïa katei ka jingïakop man u snem ban khring ruh ïa ki nongñiah kali na kylleng ka ri bad wat ki nongjngohkai pyrthei ban sakhi ïa katei ka lympung ba ki nongñiah ki pyni ïa ki sap jong ki ban ñiah bad tehlakam ïa ki kali ha ki surok kiba khohruh khohram bad lyngba katei ka lympung kan kyntiew bad pynpaw pyrthei ruh ïa katei ka jait jingïakop bad ka kam jngohkai pyrthei kumba u Myntri ka tnad jngohkai u la kular ban pynrung ha ka map jngohkai pyrthei.
Ha katei ka sngi ka jingpynkut ïa katei ka lympung naka liang ki bor pynïaid ki la sam ruh ïa ki khusnam sha ki nongjop da ki trophy bad song pisa.
Ki nongjop ha katei ka lympung ki long ha ka liang ki kynthei la rah da ka Philita Syiem Markynti Warjri ïa ka nam lahduh, ha ka Stock Caterory la rah da u Rashid Mukhim bad Banker Khongwir, ha ka Semi Modified la rah da u Cameo Lawai bad Freddy Mawrie bad ha ka Pro Modified la rah da u Mehboob K Shafi C.K.
La sam ruh ïa ki khusnam kyrpang ba kynthup ïa ka Best Driver Stock Category ba la ioh rah da u Azrel Ba lamang Dkhar, Best Co-Driver Stock Category-Barong Umdor, Best Driver Semi Modified Category- Albinus H.L. Laskor, Best Co-Driver Semi Modified Category-Wellhing Son Warkhyllew, Best Driver Pro Modified Category-Mehboob K, Best Co-Driver Promodified Category-Elrus Syngkli.