Ha ka sien kaba 5 shimti biang u samla Ferdinald Kharkamni kum u nongïalam KSU NKHD

Nongpoh, Jylliew 22: Hadien ba ka samoi treikam jong ki nongïalam ka KSU North Khasi Hills District kala poi noh sha kaba kut, ka General Election ba XI ban jied biang ïaki nongïalam ba thymmai kala long biang mynta ka sngi ha Nongpoh, bala wan ruh ban pyniaid ïaka election da ki nongïalam ka Sengkmie ba kynthup ïa u samla Raymond Kharjana Organising Secretary bad kiwei kiwei ki dkhot.
Ha katei ka sngi ban jied ïaki nongkitkam ba thymmai ka KSU NKHD la pynlong ruh ïaka jingïathep vote lyngba ki ballot paper, bala wan ban shim bynta da ki dkhot naki Circle bad ki unit bapher bapher ba hap hapoh ka North Khasi Hills District bad hadien ka jingbuh por bad kut ka jingthep vote la ñiew syndon ha katei hi ka sngi ban pynbna ïaki nongïalam ba pura jong ka KSU North Khasi Hills District naka bynta ka samoi treikam jong u snem 2024-27.
Naka liang ki dkhot ka KSU North Khasi Hills District kila ibit biang ban bynshet ïaka kam nongïalam ha u Samla Ferdinald Kharkamni bad kane ka dei ruh ka sien kaba 5 ba utei u samla un bat ïa katei ka kam nongïalam khlem da don ba ïakhun pyrshah.
Ïaka kam Vice President la bynshet ha u Samla Joseph Lambok Rymbai, James Hitler Mawphñiang kum u General Secretary, Samla Banjop Maring Assistant Secretary, Samla Baiashanlang Kharshanlor Organising Secretary, u Samla Toning Lapang kum u Education Secretary, Richard Roy Lyngdoh Nonglait kum u Information and Publicity Secretary, U Samla Johny Nongrum kum u Sports Secretary, Samla Jefrey Wahlang kum u Environment Secretary bad u John Lyngdoh kum u Office Secretary bad ïa kitei ki nongkitkam yn sa pynskhem shen da ki nongïalam ka KSU sengkmie.
Naka liang u Samla Ferdinald Kharkamni u ba la shimti biang ïaka kam President u la ai ka jingkhublei ba kyrpang ïa baroh ki dkhot kiba la ibit biang ha u ban shimti ïaka kam ban ïalam biang ïaka KSU ha North Khasi Hills District bad kum ka seng ka dang don shibun ki mat kiba dang hap ban ïakhun bad ban pynurlong naka bynta ka jaitbynriew bad ka jingtreikam jong ka seng ha kane ka kynti ba mynta kan long kaba kham pher shuh shuh.
U la ong ruh ba kum ka seng kan ïai pyrshah ïaka lynti rel katba ka sorkar kam pat pynthikna ïaki aiñ ki kyndon ban tehlakam ïaka jingrung kyrthlep jong ki mynder sha kane ka jylla, nalor kiwei ki mat ba kynthup ïa u pud u sam, ki khyrdop khajna haki khappud ba ju pyndik ïaki doh ki snam ka jaitbynriew bad kumba ka KSU ka ju buh ïaki khyrdop ILP ban tehlakam ïaka rung ka mih ki mynder ka KSU kan dang bteng ban leh bad ban pynthikna ba ki mynder kim dei ban rung bad mih laitlan sha ka jylla.