Ha ka sien kaba 30 poi ka jingïakop khwai dohkha ka JFEPA ha Wah Myntdu

Jowai, Nailur, 24: Ka jingïakop khwai dohkha kaba 30 ne ka ‘30th Fishing Competition 2023’ bala pynlong daka Jaiñtia Fishing Environmental Protection Association (JFEPA) ha kane ka sngi Saitjaiñ (23/09/23) ka long kaba ïaid beit ïaid ryntih ïa kaba la shah ban khwai naduh na Damser Treïongriang haduh ha Kharthymme Wah.
Ha ka por janmiet la pynlong ïa ka prokram sam khusnam sha ki nongkhwai la pynlong ha ïungwalieh jong ka Tpep-Pale la wan ban ïadonlang da ka kong R.V. Lyngdoh kaba dei ka CEO jong ka JMB kum ka Kongsan.
Ka kong Lyngdoh haba ai jingkren ha kane ka sngi kala pynshlur ïa ki paidbah ba kin long kiba smat ba sting ban leit khwai doh, namar ba ka long kawei na ki bynta kaba lah ban wanrah ïa ka jingkoit jingkhiah ïa u briew, ha ka juh ka por kala ong ba ki briew kin don ïa ka mynsiem jingieit ïa ka mei mariang bad kumjuh ïa ka sawdong sawkun. Ïa ka jingïalang ha kane ka sngi la pynïaid da u ma D.H. Pde President ka seng, ha ka jingïadon ryngkat u ma J.M. Pohsngap bad kiwei de ki para dkhot jong ka seng.
Ka seng ka ai khublei kyrpang ïa baroh ki dkhot jong ka kiba la trei shitom ban pynlong ïa kane ka prokram kaba jop bad haka juh ka por ka seng ka ai khublei ruh ïa baroh ki nongkhwai kiba la wan ban ïashim bynta ha kane ka jingïakop, wat la ka don hapdeng katto katne ka jingpynwit pynthut ïa ka jingïaid lynti jong ka seng.
Ïa ka First Prize na ka liang ki Dohkha Pnar la ïoh da u ma Dei Satieñ bad ka First Prize na ka liang ki Dohkha Dkhar la ïoh da u Suha Passah.
La ïoh ruh ka jingkren na u ma Pohsngap uba la ïathuh ïa ka jingïaid lynti jong ka seng naduh bala seng ïa ka kata ha u snem 1993, haka por ba jur bha ka jingpynsniew ban pynduh pyndam ïa ki doh um doh pnat kiba don ha ka wah Myntdu, ha kaba da ka jingtrei shitom jong ka seng la lah ban wanrah ïa ka jingkylla kumba long mynta.
Ïa ki kyntien ai khublei la ai da u Secretary ka seng u ma M. Challam ha kaba u la ban jur ruh ïa ki nongkhwai khamtam ïa ki samla ba kin wan sha khmat ban rung dkhot ïalade hapoh kane ka seng khnang ba ka lawei jong kane ka seng kan nangbha bad nang skhem shuh shuh na ka bynta ban ïada ïa ki dohum dohpnat ha kylleng ki wah kiba don hapoh Ri-Lum Jaiñtia.