Ha ka sien ba nyngkong pynlong ka TULBA Mawkyrwat Unit ïa ka “Road and Safety”

Mawkyrwat, Risaw 05: Kum shibynta ban ai jingpynshai halor ki aiñ ki kanun kiba ïa dei bad ki nongñiah kali, ka kynhun ki nongñiah ar shaka ne The Ultimate legend Bikers Association (TULBA) jong ka Mawkyrwat Unit mynta ka sngi ka la pynlong ïa ka jingai jinghikai kaba dei halor ka “Road & Safety” ne “Ka jingshngaiñ ha ka leit ka wan” ha ïew Mawkyrwat, South West Khasi Hills District.
La pynlong ïa katei ka prokram da ka jingthmu ka dei hadien ba ki jingjia takhuh kali ki la kiew sted bha ha kine ki snem. Namarkata, khnang ba ki nongñiah kali kin long kiba phikir bad ka jingjia jingmynsaw jong ki briew ruh kan duna bad khamtam eh ban lait na ki jingjia ba sngewsih kum ki nongñiah kali ki dei ban long a-dkar bad phikir haba ñiah ïa ki kali, ñiah ar shaka, bicycle ym tang katta kum ki paidbah kin tip ruh kumno ban pyndonkam ïa ka surok wat ïa kiba ïaid da ki kjat khnang ban lait na kino kino ki jingmynsaw bad ki jingjia ba sngewsih.
Ïa kane ka prokram la pynlong ha ryngkat ka jingïatreilang bad ka ophis jong u Superintendent of Police, South West Khasi Hills District, ka ophis u District Transport Officer (DTO), South West Khasi Hills District bad ka ophis jong u Executive Engineer (EE) jong ka PWD (Roads) Mawkyrwat Division ha kaba u bah L.W. Nongpluh Additional Superintendent jong ki Pulit, South West Khasi Hills District, Mawkyrwat u la long kum u kongsan.
Haba kren kum u kongsan, u bah L.W Nongpluh u la ong ban lait na ki jingjia mynsaw ne accident kam shong eh tang ha ki nongñiah kali ne kiba ñiah ïa ki arshaka hynrei ka dei lang ruh na ka bynta ki paidbah. U la ong ruh ba bunsien ki briew ha kane ka juk ba mynta ki kiar ban ïarap ïa ki briew lada jia ha ka jingtakhuh kali, hynrei katkum ka Section 134 (A) jong ka Motors Act ka batai shai ba kino kino ki briew kiba kloi ban ïarap ïa kiba jia mynsaw la ithuh ne pynïa ryngkat kum u nongsamaria ba bha, u la ong bad kum ka jingaimynsiem ïa ka jingshlur bad ka jinglehbha ban pynlait na ka jingïap bad ka jingmynsaw jong ki briew na ka liang ka tnad pulit ka don ruh ka buskit lada ki briew ki kloi ban ïarap ha kino kino ki bynta ïa kiba jia.
“Ban lait na ka jingjia takhuh kali, ki nongñiah kali ki dei ban kiar na ka jingdih kyiad, jingpynher sted ïa ki kali, kynmaw ban peit ïa ki jingbthah ba na ka liang ka PWD (Roads) ba la buh ha manla ki jaka ha ki surok bah bad ymdei ban don kano kano ka jingthud ne pynwit ïa u nongñiah kali namar pynthud bad kan ïalam sha ka jingbakla”, ong u bah Nongpluh. Kumta u la kyntu ruh ïa ki kmie ki kpa ba ki dei ban peit bha ïa ki khun ba kim dei ban ailad than ïa ki khun, khamtam ïa kiba hapoh 10 snem ban pynmih pathar ha surok namar ka wanrah ka jingmynsaw.
Ha ka jingkren jong u u la pynkynmaw ruh ba hapoh jong ka Ri India ha u snem 2021 shajrong ka la kiew sted bha ha ki jingjia jingïathuhkali bad la antad ba ki don haduh 1.5 lak tam kiba ïap ha ka shi snem ha ki jingjia takhuh kali bad ka jylla kaba duna tam na ka jingjia takhuh kali ka dei ka jylla Mizoram namar kane ka jylla bunsien la ju ïohi ba ki nongñiah kali, ñiah ar shaka ki bud ryntieh ïa ki jingbthah na ka tnad ba dei peit jong ka traffic.
Ha kane ka sngi la ïoh ruh ka jingkren na bah W. Mukdoh, District Transports Officer, South West Khasi Hills District kum u symbud kongsan, u bah S.I. Laso, SDO jong ka PWD (Roads) Mawkyrwat Division, u bah Kyrshanlang Nongbri, Working President ka TULBA Central Body ha ryngkat da ka jingïadonlang ruh kiwei de ki dkhot jong ka TULBA, u bah W. Snaitang, Secretary Shnong Mawkyrwat lem bad ki ‘riew rangbah.
Shuh shuh ha kane ka prokram la ïoh ruh ka jingïapule lang ïa ka jingkular ne ka pladge ba ki nongñiah kali bad ki nongïaid kjat ki dei ban bud ryntieh ïa ki traffic bad ban lait na ki jingma jingmynsaw.
Ïa kane ka prokram la pynshit pynshngaiñ da ka jingrwai kyrpang na u bah Amnis Shangdiar uwei na ki dkhot jong ka ka TULBA Mawkyrwat Unit.
Ban pynshai shuh shuh halor kane ka bynta jong ka “Road & Safety” ne “Ka jingshngaiñ ha ka leit ka wan” ka TULBA Mawkyrwat Unit ka la ïoh ban sam ruh ïa ki kot lyngkdop ba la batai shaphang ki aiñ ki kanun halor ka “Road and Safety” sha ki nongñiah kali bad ki paidbah.