Nongstoiñ, Naitung 14: Ka West Khasi Hills Blood Donation Organisation ha ka sien kaba nyngkong eh, ka la mih pyrthei ha ka lah sngi u Blei ka 14 tarik Naitun, ka la sdang ban pyni da ki kam da kaba noh synñiang da ka snam sha ka Nongstoiñ Civil Hospital kaba don ha Mawïawban.
Hashuwa ban sdang ïa ka jingnoh synñiang ïa ka snam, ki nongïalam ka organization ki la pynlong ïa ka prokram ba lyngkot ha phyllaw jong ka Blood Centre Civil Hospital Nongstoiñ, ha kaba la donlang da u bah Lumlang Kharsyiemlieh President ha ryngkat ka jingïadon lang jong ka kong Medaris Lyngdoh secretary, ki dkhot ka organization u Dr Eric Wanñiang u ba dei khmih ïa katei ka centre, ki Nurses bad kiwei kiwei.
U bah Lumlang Kharsyemlieh haba ai jingkren, u la ong ba ka jingangnud jong ki ban seng ïa katei ka organization,, ka dei hadien ba ki la ïohi ba kiba bun ki nongshong shnong napoh ka West Khasi Hills kiba wan phah sumar ha Nongstoiñ Civil Hospital, kiba donkam snam kyrkieh ki shem shitom ban ïoh, namar ba ka snam ha ka blood bank jong katei ka hospital kam pat biang bad ki hap ban mareh sahduh Shillong ban ïoh snam na ki Hospital. Lada dei kiba duk kiba kyrduh lei lei tang ka bai leit bai wan ruh ki shitom haduh katta katta ban ïoh,
Lada ka blood bank ha Civil Hospital Nongstoiñ ka biang ka la ïarap haduh katta katta ïa ki nongpang kiba don kam snam kyrkieh. U la kyntu bad pynshlur ïa ki para nongshong shnong hapoh ka district, ba kim dei ban sheptieng ban wan ai snam namar ki doctor ki tip ïa kiba kum kino ki briew ka long ban shim snam bad ïa kiba kum kino ym long ban shim.
Related Posts
Ha kane ka sngi la ïoh ruh ïa ka jingkren na u Doktor Erick Wanñiang, ha kaba u la pynshai ba naduh ba ka blood bank ka la don ha katei ka hospital. La sdang ban pyntrei kam ïa ka ki la don haduh san spah sawphew ngut kiba shitom bad kiba donkam snam kyrkieh kiba la lait im bad kiba la ïoh jingkoit, namar la ïoh ban ai snam ïa ki ha ka por kaba biang namar la lah ban ïoh na katei ka blood bank centre.
Nalor kata u la ong ruh ba katei ka blood centre ha katei ka hospital, ka dang donkam shibun bah ka snam namar kat nang mih ki snem kiba ïoh jingpang duna snam na ka daw jong ka jingbleed kynsan, kiba aksiden bad kiwei kiwei ki nang bun, kumta ban ïarap bad ban pynim ïa ki para mynsiem ba kordor kiba don ha pdeng jong ka jingeh ka long kaba don kam bha.
U la ong ruh ba u briew u dei u jingthaw u ba kyrpang tam na ki para jingthaw baroh bad haba u donkam ïa ka snam ha ka por ba u shitom jur, yn ym lah ban thep da ka snam jong kiwei pat ki jait jingthaw ha ka met u briew, hynrei dei tang ka snam jong u para briew kaba lah ban pyndonkam.
U la ong ruh ba ki la don shibun bah ki riew stad saïan kiba la pyrshang ban leh research ban shna ïa ka snam, hynrei haduh mynta ym pat don satia uno uno u riewstad ha ka pyrthei uba lah ban shna snam.
U doctor Wanñiang u la kyntu bad pynshlur ïa ki paitbah ba kin wan shakhmat ban noh synñiang snam ha katei ka centre, namar lada ki don ki ba haïing ha sem jong ki kiba shitom ne aksiden bad kiba la donkam snam kyrkieh, ki lah ban ïoh na katei ka centre bad kin lait na ka jingluttksan da kaba ki hap ban leit shaduh ki hospital ha Shillong.