Shillong, Risaw 12: Ka 2nd edition jong ka Shillong Book Fair, ba la pynlong da ka National Book Trust kaba hapoh ka Ministry of Education, Government of India, ka la buh ïa ka dukan kaba don ïa baroh ki jait ktien kum ka ktien Sindhi. Kane ka dukan la buh da ka jingtmu ban kyntiew bad ban pynneh pynsah, ka kolshor jong ka kynhun Sindhi kaba dei kawei na ka kynhun kaba la rim tam ha ka pyrthei.
Na ka liang ka Uma Jatiani, kaba dei kawei na ki nongdie ba la shah jied na Shillong da ka National Council for Promotion of Sindhi Language (NCPSL), ka la batai halor ka jingdonkam jong kane ka jingsdang. “Kane ka jaka ka la ïarap ïa ngi ban kyntiew ïa ka ktien. Ka NCPSL ka la leh ïa ka kam kaba kongsan bha ban shon ïa ki kot pule bad kiwei kiwei pat ki kam,” ka la ong.
Hadien ba la thaw ïa ka ha ka 26 tarik u Jymmang, 1994, ka NCPSL ka treikam da kaba laitluid kum ka registered body hapoh ka tnat Higher Education, Ministry of Education, kaba don ruh ïa ka headquarters jong ka Nongbah New Delhi. Ka jingbuh ïa ka Sindhi bookstall ha kane ka fair ka la ïarap ha kaba ki la don haduh 150 tylli ki kot, kynthup ïa ki kot jong ki khynnah pule bad kumjuh ruh kiba lah ban pyndonkam da kiba ïakhun ïa ka eksam UPSC. “Lada kiba ïakhun ïa ka civil service ki jied ïa ka ktien Sindhi ha ka jingïakhun ïa ka UPSC exam, kine ki kot ki long kiba ïarap bha. Kadei ka subject kaba lah ban ïoh marks bun namar ïa ki jingkylli la pynshong noongrim halor kine ki kot,” ïathuh ka Jatiani. Ha kane ka dukan ki don ruh kumba 14 tylli ki kot na ka bynta ki master’s degree courses bad 3 tylli na ka bynta ka diploma, certificate, bad kiwei pat ki course.
Ïa ka ktien Sindhi, kaba la tip ba ka don artylli ki script, ka Devanagari bad Arabic, ha kaba ïa ka Devanagari ka dei kaba la ju pyndonkam bha ban pule bad thoh.
Na ka liang u Bah Aloysius Papang, uba dei ruh u ophisar barim ka jylla Meghalaya bad YouTuber, dangshen u la leit ban jngoh ïa ka dukan ha kaba u la ïathuh shaphang ka jingïoh mad jong u ha kaba ïadei bad ka vlog, ha kaba u la ïarap ban pynsngewthuh shaphang ka kynhun Sindhi bad ki ktien jong ka.
Ha kane ka book fair ka la don ruh ka prokram ba kyrpang na ka bynta ki khynnah kaba la pynlong ha ka sngi Palei, 2024. Ki nongïashim bynta ki la ïoh ruh ka lad ban ïadonbynta hapoh ka Rastriya e-Pustakalaya, kaba dei ka online library. Kham hadien ka la don ruh ka jingpule ïa ka poetry Hindi ba la pule da Vaishnavi Sharma, bad ka jingput bisli da u Bah Benedict Hynñiewta bad ba la pynbyrnia ïa kane ka sngi da ka kynhun tem Colors.
Ban pynphriang shaphang ka jingpynlong ïa ka book fair, ka la don ka mobile bookstore bad ka library kaba la plie ha ka 2 tarik mynta u bnai, 2024 ha kaba kane ka la saphriang ha kylleng ka jylla Meghalaya bad ka Assam. Kane ka mobile library kan sa leit ruh ban jngoh ïa ka Ri Bhoi naduh ka 15 tarik haduh ka 20 tarik mynta u bnai, bad sha West Khasi Hills naduh ka 21 tarik haduh ka 23 tarik, bad sha East Garo Hills naduh ka 24 tarik une u bnai haduh ka 26 tarik.
Hadien pat kan sa leit phai pat sa sha Assam, ban leit jngoh ïa ka Goalpara haduh ban da poi ka 31 tarik mynta u bnai, bad kan sa sah hapoh ka Bongaigaon naduh ka 1 tarik u Naiwieng haduh ka 3 tarik, bad ha Dhubri naduh ka 4 tarik haduh ka 8 tarik u Naiwieng. Kane ka mobile bookstore kan sa leit phai noh sha New Delhi ha ka 9 tarik u Naiwieng.
