Ha ka sien ba nyngkong ïohrung World Cup ka Uzbekistan bad ka Jordan; buh jaka ka South Korea

SHILLONG, Jylliew 06: Ka Uzbekistan bad ka Jordan ki la pynthikna ïalade ban rung sha ka World Cup ha ka sien kaba nyngkong ha ka sngi Palei, katba ka South Korea kaba ju ïohrung barabor ruh ka la buh ïa ka jaka na ka bynta katei ka lympung ban long ha North America ha u snem ban wan da kaba jop ïa ka Iraq da 2-0 kol ha Basra.
Ka Uzbekistan ka la buh ïa ka jaka ha katei ka lympung ba la pynheh sha ki 48 tylli ki kynhun da kaba ïakhaid pyrshah ïa ka United Arab Emirates da 0-0 kol, kaba la pynthikna ïa ka kynhun jong u Timur Kapadze ban pyndep ha ka kyrdan ba ar na ka Group A ryngkat ka Iran kaba la dep rung lypa namar ka bat ïa ka kyrdan ba nyngkong.
Ha kawei pat ka jingïalehkai u Kim Jin-gyu (63’) bad u Oh Hyeon-gyu (82’) ki la pynkhih ïa ki ar tylli ki kol ba kongsan na bynta ka South Korea pyrshah ïa ka Iraq kaba la shah pynduna sha ka 10-ngut namar ba ïoh red card u Ali Al Hamadi, bad kane ka jingjop ym tang ba ka la buh jaka ïa ka kynhun jong u Hong Myung-bo na ka Group B hynrei ka la pynthikna ba ka Jordan ruh kan ïohrung.
Ka Jordan ka la lah ban pynliem ïa ka Oman da 3-0 kol ha ka jingïalehkai kaba kham mynshwa lyngba ka hat-trick jong u Ali Olwan, hynrei ka kynhun jong u Jamal Sellami ka la hap ban ap ïa ka resol na ka jingïalehkai jong ka Iraq bad ka Korea shuwa ba kan ïoh ban rakhe ïa ka jingïoh rung sha ka World Cup ha ka sien ba nyngkong.