Shillong, Nailar 05 : Ha ka por jongka sorkar u Dr Mukul Sangma ki nonghikai bad ki nongtrei sorkar kim donkam ban ïakhih ban ïoh ïa ka tulop hynrei kane ka sorkar MDA hapoh ka jingïalam u Myntri Rangbah u Conrad K Sangma wat la hap ban ïakhih ruh kim ïoh satia ïa ka tulop ong u MLA ka Salmanpara u Winnerson D Sangma haba kren ha ka jingïalang ban seng ïaka Block Committee ka TMC ha Mendipathar West Garo Hills.
U la ong “ Ha ka por jongka sorkar u Dr Mukul ki paidbah ki dang ïohi ïa ka roi ka par hakhmat jongki hynrei mynta pat kim ïohi satia ei ei ruh. Kumta kumba ki paidbah ki don ka bor ha kane ka ri synshar paidbah, nga kwah ban pynkynmaw ba haba ki ïohi ba ka sorkar kam leh ei ei ki don ka bor ban leh ei ei bad ki don ka jingkit khlieh ruh ban wanrah ka jingkylla bad ka dei ruh ka kamram jongngi ki paidbah ban kynthoh ïa ka jingbym lah ai jingshakri jongka sorkar” .
Kumjuh ruh na ka liang u MDC ka Kharkutta u Cherak W Momin u la ong “ Lada phi ïa nujor ka sorkar ba mynshwa bad kane ka sorkar ba mynta ngin ïohi ba ha baroh ka jylla ym shym la pyntreikam hok ïa ka pisa bad wat ki nongtrei sorkar ruh kim ïoh tulop thikna bad kumta ki paidbah kila ngiah lada ki kynmaw ha ka por jongka sorkar u Dr Mukul”.
Ha kane ka jingïalang la pynrung dkhot ïa kiba bun ki nongkyrshan jong ka TMC bad la jied ruh ïa u Cambleson Sangma kum u Advisor.
Ki nongïalam ka TMC ki la pynpaw ba kat shaba ki nongïalam jongka party ki leit ki ïoh ka jingkyrshan ba pura beit na ki paidbah namar ki ia wan beit sha ki jingïalang ban sngap ïa kaei kaba ki nongïalam ki don ban pynshai.
Kiwei kiwei kiba la ïadon lang ha kane ka jingïalang ki long u Rinaldo K Sangma MDC Rongrong, Agassi R Marak MDC Balachanda, Pardinand D Shira MDC Damas bad Barthiar Momin u Coordinator ka TMC Mendipathar.
