Ha ka Phan Nonglait Day yn rakhe dap 500 snem ka Hima Nongkhlaw, pynkut ha ka Khasi Awakening Day

Shillong, Risaw 22: Ka Hima Nongkhlaw kawei na ki Hima ba pawnam jong ka Ri Khasi mynta ka la dap san spah snem bad kan pynlong ïa ka jingrakhe ba la tip kum ka Quincentenary ka ban sdang naduh ka 6 tarik u Nohprah 2024, kaba dei ka lyngkhuh sngi ïap jong ka Phan Nonglait, ka riewshlur jong ka Ri Khasi. Ïa kane ka jingrakhe yn pynkut ha ka 4 tarik u Ïaïong 2025, kaba dei ka sngi kaba ka Hima Nongkhlaw bad ki Hima Khasi ki la ïeng pyrshah ïa ka jingsynshar ki Phareng ba la tip kum ka Khasi Awakening Day.
Na ka bynta kane ka jingrakhe ka Hima ka la thung ïa ka Special Committee ha kaba u Syiem ka Hima, u Pai’iem PM Syiemlieh u long u Chairman bad u Syiem Khynnah, u Pa’iem KM Syiemlieh u long u Secretary bad ki Myntri bad katto katne ki Sordar Shnong ki long ki Dkhot.
Haba ïakren bad ki nongthoh khubor ha Shillong Press Club, u Pa’iem, u la ïathuh ba ïa ka Hima Nongkhlw la pynlong da ki 14 tylli ki Raid bad 8 tylli ki Lyngdoh ha ka snem 1524 bad dei namar kane ka daw ïa ka Hima Nongkhlaw ka ju tip ruh kum ka Hima Khatsaw Phra.
U Syiem ba nyngkong eh jong ka Hima udei u Shajer Syiem uba la synshar naduh ka snem 1524 haduh ka snem 1554. Naduh ka por u Shajer haduh mynta ka Hima Nongkhlaw ka la ïoh 20 ngut ki Syiem ba pura bad 5 ngut ki Acting Syiem. Ka Hima ka la pawbha ha ka por ba synshar u Tirot Sing Syiem uba la synshar naduh ka snem 1814 haduh ka snem 1834, ha kaba u la ïalam ïa ka Hima ban ïeng ïaleh pyrshah ïa ka jingleh donbor ki Phareng ha ka por na shna ïa ka surok na Kamrup sha Sylhet lyngba ka Nongkhlaw. Ka thma ki Khasi bad ki Phareng ka la neh saw snem tad haduh ba u Tirot Sing Syiem u la shah kem bad shah set phatok sha Dhaka bad u la ïap noh ha Byndi ha ka 17 tarik u Naitung ka snem 1835.
Ha kane ka jingrakhe ka Hima ka la rai ban pynlong ïa ki Prokram bapher bapher kiba kynthup ïa ki jingialehkai Sport kum ka Ïakop siat khnam, ka Phutbol ban pynlong ha ki 8 tylli ki Zone ryngkat ka Grand Finale ha Mairang. Nangta ka Basketball na ka bynta ki Kynthei, ka Marathon, ka Cycling, ka jingïakop khwai, ka Debate Competition, ka Quiz Competition, ka Skit Competition halor ka thma u Tirot Sing ban pyni da ka Video. Kan don ruh ka Panel Discussion halor ka Riti Ka Dustur u Khasi, ka jingpynkhuid shnong ha baroh ki shnong ba hap ha Hima Nongkhlaw, ka jingiakop rwai tynrai bad kiwei kiwei de ki prokram. Kan don ruh ka jingpynmih ïa ka Documentary Film halor ka Hima Nongkhlaw kum ka dak ban pynsah kynmaw ïa kane ka jingrakhe.
Ban pynsah kynmaw ïa kane ka lyngkhuh snem ba san spah jong ka Hima, la rai ruh ban pynïeng ne sieh ki mawbynna ha Madan Mot Tirot bad ban pynmih ruh ïa ka jingrwai Anthem jong ka Hima. Ha kine ki sngi ba don ka jingrakhe kin don ki ruh ki dukan ne ki stall ban buh ïa ki tiar tynrai bad ki jingbam tynrai.
Ka Hima ka khot ka wer ïa ka jingïashim bynta jong ki khun ki hajar ka Hima ha kine ki jingïakop bad ki prokram bapher bapher ban pynlong ïa kane ka jingrakhe kaba iphuh iphieng.