Nongpoh, Kyllalyngkot 21: Ban wan rah ïa ka jingïatylli bad ka thong ban dang pynneh pynsah ïa ki riti ki dustur ka jaid Bynriew Karbi, ka ki jaid bynriew Karbi ha ka lama ka All Meghalaya Karbi Association hynnin ka sngi ka la pynlong ïa ka 48th Annual Conference ha ka Shnong Sohliya ha Ri Bhoi na ka bynta ban ïalum ïalang lang kum ka jaid bynriew Karbi hapoh Meghalaya kaba ki la buh kawei ka thong ban pynneh ïa ka shongsuk shongsain hapoh ka jylla Meghalaya.
Kum ban pynkynmaw, ka All Meghalaya Karbi Association ka ju pynlong man la u snem ïa kane ka jingïakynduh lang jong ki paid Karbi ha Meghalaya bad ka jingangnud hi ka long ban don ka jingïatylli para jaid bynriew Karbi bad ruh ban dang pynneh pynsah ïa ki riti ki dustur bad ka jinglong tynrai ki paid Karbi ha Meghalaya.
Ïa kane ka jingïakynduh lang ki paid Karbi na Meghalaya la wan ban shim bynta da u Executive member ka Karbi Anglong Autonomous Council, U Syrya Rongphar kum u kongsan bad la ïa don lang ruh u Bah B.S Teron, u nongseng ïa ka AMKA, u president ka Karbi Students Association, u Samdon Teron, U President ka AMKA, u bah Bistocan Timung, kiwei ki nongïalam bad ki paid Karbi na ki shnong bapher bapher ka Ri Bhoi.
La pynphuh pynphieng ruh ïa kane ka jingïakynduh lang ki paid Karbi na Meghalaya, da ka jingshim bynta ki khun samla kiba la ai ïa ki jingrwai bad ki jingshad tynrai jong ka jaid bynriew Karbi, kaba long ruh ka thong ka jong ki ban pynneh pynsah ïa la ki riti ki dustur.
Haba ai jingkren ha kane ka sngi, naduh u EM ka KAAC, u Syrya Rongphar bad ki nongïalam ka AMKA ka khubor kaba ki la ai pynphriang lyngba kane ka jingïakynduh lang ka long ban pynneh pynsah ïa ka shongsuk shongsain hapoh ka jylla Meghalaya hapdeng ki jaid bynriew Karbi bad ki Khasi.
Ki la ban khia ruh nalor ka shongsuk shongsaiñ hapdeng ki Khasi bad ki Karbi, ka AMKa ka don ruh ïa ka thong ba kum ki jaid bynriew Karbi kim dei ban klet ïa la ka jong ka tynrai na ka bynta ban pynneh ia ka riti ka dustur la ki don ha ka jylla Meghalaya ne ha Assam.
Shuh shuh, ki ka khubor kaba kham kongsan kaba ki la pynpaw paidbah lyngba kane ka jingïakynduh lang, nalor ka jingdonkam ban pynneh ïa ka shongsuk shongsaiñ ki la khot la wer ruh ban don ka jingïaieid bad jingïatylli hapdeng ki paid riewlum khamtam ki Khasi bad Karbi kiba la long kum shi para kiba la ïa im ïa bam lang naduh ki por hyndai hynthai bad ruh ki don ki Khasi kiba shong basah ha Karbi Anglong, Assam bad ki don ruh ki Karbi kiba shong basah ha Meghalaya.
