Ha ka jingsakhi u Bah Sohthenes Sohtun la pynskhem ïa ka NPP Farmers Front, Jirang Block

By Mawphor Editor On Sep 6, 2026

Shillong, Nailur 5: U Myntri Sorkar ba peit ïa ka tnad C & RD Block uba dei u MLA ka NPP na Jirang u Bah Sohthenes Sohtun ha ryngkat bad u Bah Egentstar Kurkalang uba dei u Secretary jong ka State National People Party Farmers Front, ha ka 5 tarik u Nailur kila da ka shithi thung kam ïa ki dkhot jong ka NPP Farmers Front Jirang Block.
Ïa kane ka jingpynskhem ïa ki nongkitkan ba pura jong ka NPP Farmers Front Jirang Block la pynlong ha Dorbar Hall jong ka shnong Patharkhmah, ha ka jingsakhi lang ki Sordar Shnong bapher bapher jong ka dong ka thain bad kumjuh ruh ki longkmie.
Ha kane ka sngi na ka liang jong u Bah Daminot Sylliang uba dei u District President ka NPP Farmers Front Ri Bhoi u la pynshai ïa ka jingthmu bad ka rukom trei kam jong ka Farmers Front.
Ha kane ka sngi ka dorbar hall jong ka shnong Pathar khmah kala dap smam kiba kwah tip shaphang ka jingtrei kam jong ka Farmers Front.
Ïa ki shithi pynskhem la aiti da u Bah Kurkalang, u Bah Syliang bad kumjuh ruh da u Bah Sosthenes Sohtun uba dei u Myntri Sorkar, uba dei ruh u MLA bad MDC ka Jirang Constituency.
Na ka liang u Bah Egentstar Kurkalang haba kren u la pynshai ïa ka jingmyntoi ba ki paidbah nongrep kin ioh lyngba ka jingiarap namar kumba long baroh shi katta ki nongrep ki shu kut beit na ïing sha lyngkha.
“Mynta ba la don kane ka NNP Farmers Front Jirang Block, ki dkhot kane ka block kidei ban leit kynduh ïa ki ophisar ban wad jingtip shaphang ki skhim bapher bapher ba ki don khnang ba ki paidbah kin ioh ka jingmyntoi ba khraw na ki ophis sorkar” ong u Bah Kurkalang.
Na ka liang u MLA ka thain uba dei ruh u Myntri Sorkar u la ai ka jingïaroh ïa ki nongialam naduh ka State bad District kiba dei jong ka NPP Farmers Front bad halor kane kan plie ka lad ka lynti bad ngi la iohi ki jingmyntoi ba ki nongrep ki ioh.
Hapoh ka Jirang Constituency ki nongrep ki bun bha haduh katta katta kumta kane ka block kaba dang shu shah pynskhem kadei ban plie ka lad ka lynti na ka bynta ki nongrep ban ruh ban prat lynti ban ïalam ban pynsuk ban ioh ïa ki skhim bapher bapher ba ka sorkar kala buh.
Hooid kadei ka jingshisha ba bun ki nongrep kim tip ïa ki jingmyntoi ba kidei ban ioh hynrei lyngba kane ka Farmers Front kaba dei ka kynhun ba peit kyrpang na ka bynta ki nongrep kan sa long ka lynti ka ban pynpoi sha ka sorkar ban ioh jingiarap ba ki nongrep ki donkam.