Ha ka jingphuh jingphieng, pynkut ka SSSM ïa ka jingrakhe dap 25 snem ha ka Shnong Mawten

By Mawphor Editor On Dec 24, 2023

Mawkyrwat, Nohprah 23: Ka Seng Samla Shnong Mawten (SSSM), South West Khasi Hills District ka la ïoh ban pynkut noh ïa ka jingrakhe ïa ka jingdap 25 snem jong ka jingïaid lynti ban ai jingshakri hapoh ka shnong ka thaw ha kaba u Ma Vincent H. Pala, MP ka Lok Sabha na ka Shillong Constituency u la long kum u kongsan ha ka jingïalang ba la pynlong ha madan Synrang Mawrin.
Haba kren kum u kongsan, u Ma Vincent H. Pala u la ai ka jingïaroh ïa ka Seng Samla shnong Mawten ba lyngba ka jingtreikam jong ki nongkitkam barim haduh ki nongkitkam jong une u snem, ki rangbah shnong bad baroh kiba la don bynta ban pynurlong haduh kane ka por ban kynjoh ïa u maw mer ba arphew san ha kaba kane kan long ka dak jong ka jingsah jingkynmaw ba kum ki samla ki don ka jingïatylli hapoh ka shnong ba lyngba jong ki ka don ruh ka jingkyrmen ïa ka lawei ba phyrnai.
Ha kajuh ka por, u la ong ruh ba barabor ki samla ki dei ki lawei na ka bynta ka jingbha ha ki shnong ki thaw, ha ka imlang sahlang bad kum ki nongïalam saiñ pyrthei ki leit ki wan tang hapoh ka 5 snem namarkata, lada ki samla ka imlang sah lang bad ki paidbah ki bakla ki nongïalam ha ka saiñ pyrthei ki bakla bad lada ka ïing ka sem ka shnong ki thaw bad ki samla ki long kiba jop bad kiba ïaid beit ïaid ryntih ka imlang sahlang ka niam ka rukom bad ka riti ka dustur ka im bad ka jaidbynriew ruh ka don ïa ka lawei jong ka jingkyrmen.
U Ma Vincent Pala u la ong ruh ba u sngewtynnad ban ïohi ïa ki samla kynthei bad shynrang kiba mih shakhmat ban ïashimbynta ha ka rwai ka siaw, ha ka shad ka kmen bad ha ki kam ïalehkai bapher bapher bad kane ka long shibynta jong ka jingpynneh pynsah ïa ki riti ki dustur jong kane ka shnong ka thaw bad ka jaidbynriew baroh kawei. Kumta kaba donkam mynta ka long ban pynshlur bad pynskhem ba ki samla nangne kin long ki nongïalam ïa ka shnong bad ïa ka jaidbynriew baroh kawei bad u ai ka jingkyrmen ba na ka liang jong u ryngkat u MDC kin ïai don ryngkat bad ki la ha kino kino ki bynta.
Haba kren pynkut, u la ai ruh ki kyntien jingkhublei khristmas bad snem thymmai basuk bakmen ïa baroh lyngba ka jingpynkylla thymmai ïa ki jingim jong ki briew na kiba sniew sha ka jingbha na ka bynta ïa lade shi met shi met bad ïa ka jaidbynriew khamtam ïa ki samla ban ai ka jingïarap ïa ki briew ban lait na ki jingsniew kiba ker sawdong.
Kiba ïa donlang ha kane ka sngi ki long u bah Carness Sohshang, MDC ka Mawkyrwat Constituency bad kum u EM ka KHADC, u bah Kynpham V. Kharlyngdoh, u bah Lovingwell Lyngdoh, Myntri Shnong Mawten, ki nongkitkam jong ka Seng Samla Shnong Mawten, Mawlangwir, Mawkyrwat & Nonglang bad kiwei de.
Ha kane ka sngi ka la don ruh ka jingsam ïa ki khusnam kiba la jop ha ki jingïalehkai bapher bapher kata ha ka jingïalehkai kynjatbol, mawpoiñ, volleyball, marathon, jngi-um, corrom, tied-di-bet bad kiwei de ki jait jingïalehkai bad jingpynkup burom ïa ki nongkitkam jong ka Seng Samla Shnong Mawten ha ki snem ba la dep bad kumjuh ruh ki nongïalehkai kiba la mihkhmat ha kiwei de ki jaka.
Nangta, la ïoh ruh ki kyrwoh jingkhublei ne Greetings na ki Seng Samla Shnong kata Mawkyrwat bad Mawlangwir.
La pynshit pynshngaiñ ïa kane ka sngi da ka jingshad bad jingrwai na ki samla kiba la jop ha ka jingïakop ba la pynlong ha ki sngi ba la dep kata na ka Badapjingkyrmen Nongsiej, ka Rikyntihun Lyngkhoi, ka Little Group bad na ka Labiang.
Ka pynïaid bad jingkren pdiang sngewbha la ïoh na u Dr. K.K. Nongsiej, katba u bah C.A. Lyngdoh, President ka Seng Samla Shnong Mawten ula pynbud da ka jingkren khublei.