Ha ka jinglut ba T. 3 klur, yn tei thymmai ïa ka ophis BDO Khatarshnong-Laitkroh Block

Shillong, Naiwieng 04: U Myntri ba dei khmih ïa ka tnad Community and Rural Development ka Sorkar Jylla, u Bah Hamletson Dohling ha ka 04 tarik u Naiwieng, 2022 u la wan ban buh ïa u mawnongrim ban tei thymmai noh ïa ka ophis Block Development Officer (BD0) ka Khatarshnong-Laitkroh C&RD Block ha ka jingïalang ha Mawkdok.
Haba kren ha ka jingïalang, u Bah Hamletson u la pyntip ba ka Sorkar Jylla ka la mang 120 klur tyngka ban pynbit pynbiang ïa 40 tylli ki ophis BDO ha kylleng ka Jylla Meghalaya.
U la ong ba ka tnad ka la ïaid sha khmat ban pyntyllun ïa ka jingtei ïa 6 tylli ki ophis Block bad bynrap ba ka jingpyntreikam ïa ka Mahatma Gandhi National Rural Employment Guarantee Act (MGNREGA) lane ka aiñ bylla shi spah sngi ruh ka treikam bha ha ka Jylla.
U la pyntip ba ha u snem 2021-2022 ki jingtrei ba palat 1600 klur la pyntreikam da ki Village Employment Council bapher bapher. U la ong ba 130 klur tyngka ka dei ka dei ka bhah pynlut ka Sorkar na ka bynta ka bai tiar bad ka Sorkar Jylla ka dang pan sa 300 klur na ka Sorkar India ban siew ïa ka bai tiar.
Na ka liang u nongthaw aiñ ka Sohra, Bah Gavin Miguel Mylliem u la ong ba mynshwa kam ju don mang tyngka ban pynbiang pynbha ïa ki jingtei ïa ki ophis BDO hynrei kane ka Sorkar ba mynta ka la sngap ïa ka jingud ki paidbah bad mang tyngka na ka bynta kane kam.
U la ai jingmut ïa ka tnad ban ïaleh ban pynbiang ïa ka kam nalor ka um bad ka bor ding elektrik bad bynrap ba ka Sorkar ka la leh bun kiei kiei ban kyntiew ïa ka roi ka par. U la ong ba hapoh ka Khatarshnong-Laitkroh C&RD Block ki don 800 tylli ki Village Organisation bad 700 tylli ki Self Help Group.
Kiwei kiba la ai jingkren ki kynthup ïa u Bah T Lyngwa, Secretary, u SC Sadhu, Director ka tnad Community and Rural Development ka Sorkar Jylla, u Bah P Tynsong, BDO nalor kiwei pat.