Shillong, Sept 30 : Ka Central Puja Committee (CPC), Meghalaya, ka la pynlong ïa ka 32nd Annual Drum-Beat Competition ne ka jingïakop tem ksing, ha ka sngi Nyngkong ha Sarojini Girls Upper Primary School, R.R. Colony, Shillong.
ïa kane ka jingïakob tem ksing la pynlong da ka R.R. Colony Saradiya Utsav Samiti, ha kaba la sakhi ïa ka jingwan ïashimbynta bun tylli ki Puja committee bad ki riewshimet na kylleng ka nongbah.
Ha ka jingïakob tem ksing shimet ïa ka 1st Prize ne wan nyngkong da u Moniram Das & Subal Das (R.R. Colony Saradiya Utsav Samiti), katba u Biswajit Kinnar & Pulin Kinnar (Rilbong Durga Puja Committee) kila wan baar bad u Mukul Kinnar & Bipul Kinnar (Survey of India Durga Puja Committee) kila wan balai.
Ha kyrdan tem kum ka kynhun ïa ka nam lahduh la ïoh da ka Rilbong Durga Puja Committee (kaba la ïoh ïa ka Shiv Kumar Memorial Running Trophy), la wan baar da ka R.R. Colony Saradiya Utsav Samiti bad ka New Colony Durga Puja Committee kala wan balai.
Nalor kane ka Pragati Sangha Sarbajanin Durga Puja Committee, Keating Road, kala ïoh ïa ka khusnam kyrpang kum ka kynhun kaba lah ban pynshongshit bad pynbyrngia.
Ka CPC kala pynbna ruh ba baroh kiba la ïashimbynta ha kane ka jingïakob na ki Durga Puja Committees ha Shillong kin ïoh mar T.1,000 kum ka Consolation Prize.
ïa ka Shiv Kumar Memorial Running Trophy, ryngkat bad ka song tyngka bad ki takma na ka bynta ka kynhun lahduh, la noh synniang da u Ajay Agarwal na Lama Villa, Shillong, kum ka dak ban kynmaw burom ïa la u kpa uba la khlad noh u Shiv Kumar Agarwal.
