Ha ka jingdap 60 snem ka Balang la pynkyntang ïa ka ïingmane thymmai ka Balang Katholik ha Umktieh

Nongpoh, Lber 16: Da ka mynsiem kaba dap jingkmen ka Balang Katholik Umktieh kaba hap hapoh ka Sub District Umroi, Mawbri Parish ha ka sngi U Blei ka la pynhap pyrda noh ïa ka jingrakhe ïa ka Jubili 60 snem jong ka Balang Shnong bad ha kane ka sngi ruh la pynkyntang ïa ka ïingmane ba thymmai ba la tei itynnad bha da ki paidriengngeit ka Balang Shnong Umktieh.
Ha ka jingpynkyntang ïa kane ka ïingamne ba thymmai bad ka jingpynkut ïa ka jingrakhe ïa ka Jubili dap 60 snem ka Balang Katholik hapoh ka shnong Umktieh la pynlong da ka Mass Bakhuid ha ka por mynstep ba la pynbynta da u Archbishop ka Jylla Niambah ShillongMost Rev. Victor Lyngdoh ryngkat ka jingsakhi lang jong u Parish Priest ka Mawbri Parish u Fr. Belestine Marbaniang, kiwei pat ki Lyngdoh Sohblei, ki Sister, ki Catechist, ki Rangbah Balang bad ki hajar ngut ki paidriewngeit ka Balang Katholik.
Ha kane ka sngi, da ki spah ngut ki heprit ki la ïoh pdiang ïa ka Communion banyngkong ha ka sien banyngkong eh ha ka jingim jong ki.
Kum ban shu pyntip, ïa ka Balang Katholik ha ka shnong Umktieh la seng ha u snem 1966 tang ki saw tylli ki longïing Katholik ha kaba ki la shna ïa ka ïingmane kaba rit bad dei lyngba kine ki soh nyngiong ba la sdang roi ka jingngeit Katholik ba kane ka Balang Shnong. Dei ha u snem 2014 ba kane ka Balang Katholik ha Umktieh ka la rakhe ïa ka Jubili Ksiar hadien ba ka la roi sted bha bad mynta kane ka Balang Shnong ka la rakhe sa ïa ka Jubili 60 snem na ka jingroi ki paidriewngeit ka la kot sha ka 170 tylli ki rympei ïing.
U Archbishop Victor haba sam ïa ka ktien ka jong u Blei u la ong ba ka jinglah ban tei ïa kane ka ïingmane ka dei lyngba ka jingdon jong u Blei. Ka jingdon jingdon ka ïingmane ka long ban tip ïa u Blei, ban ieid ïa u Blei bad ban shakri ïa u Blei.
U la ong ruh ka jingdon ka ïingmane ka long ban ïa duwai lang ban ïa shakri lang bad ruh ban pan lang ka jingkyrkhu na u Blei. Dei hapoh kane ka ïingmane ki lah ruh ban saiñdur ïa ka jingngeit ban tip ïa u Blei.
ïa kane ka ïingmane la ai nam ruh ha ka Maria Theisotti Bakhuid.