Ha ka jingdap 50 snem ka shnong Kynton U Mon, ai u Bah Lambor da ka surok bad pump um

Shillong, ïaïong, 02: Ha ka sngi pynhap pyrda ïa ka jingrakhe dap 50 snem jong ka shnong Kynton U Mon, Raid Nongkrem ka Hima Khyrim ha ka sngi Balang, u MLA & MDC jong ka Nongkrem Constituency u Bah Lambor Malngiang, u la plie paidbah ïa ka surok rong ba 1.258 kilomitar bad aiti ruh da ka pump um ha kane ka shnong.
Ïa kane ka surok la mang pisa ha u bnai Naitung, 2020 na ka tnad PWD ka Sorkar Jylla katba ïa ka pump um na ka bynta ka jingmyntoi ki nongshong shnong u Bah Lambor u la mang pisa na ka Special Rural Work Programme (SRWP).
Ka shnong Kynton u Mon ka la sdang ïa ka jingrakhe dap 50 ha u snem 2021 bad la pynkut pat ha ka sngi Balang ha kaba u Bah Lambor kum u kongsan u la pynhiar ïa ka lama ha ka jingïadonlang u Bah Bhalang Lyngdoh, Chairman ka Nongkrem Dorbar Pyllun, Bah R Wankhar, Rangbah Shnong, ki nongkitkam shnong nalor ki nongshong shnong.
La pynbyrngia ïa ki paidbah da ki jingrwai bad jingshad da ki khynnah skul na ki skul kiba don ha kane ka shnong bad da ki jingïaleh kai bapher bapher nalor kiwei pat ki prokram.
Haba ai ïa ka kyntien kyrkhu kyrdoh ïa ka shnong bad ki nongshong ba kin ïai don hapdeng ka met kaba koit ba khiah bad ban kiew irat ha ka khih ka kamai, u Bah Lambor u la ong ba ka jingwanrah ïa ka roi ka par ka dei ka jingïatreilang bad jingïatylli hi ka shnong.
U la ai ka jingïaroh ïa ka shnong hapoh ka jingïalam jong ki nongkitkam, ka shnong ka la nang ïai kiew ha ki bynta bapher naduh ki surok, ki lynti ki syngkien, ki jaka pule. “Ngan sa ai ki jaka theh ñiut ban tehlakam ïa ka jingbret ñiut pathar ha baroh 6 dong jong ka shnong”, u la ong.
Une u nongmihkhmat u la pynpaw ka jingkynmmaw burom ruh ïa u Bah Slam Kharkongor (bam kwai ha dwar u Blei) uba dei u Rangbah Shnong ba nyngkong kane ka shnong kaba la thaw nyngkong tang da 15 tylli ki longïing ha u snem 1972.
Ha kane ka sngi la pynlong ruh ïa ka phainal phutbol hapdeng ka Lwai bad Main Road ha kaba ka Lwai ka la rah ïa ka nam lahduh bad ïa ki khusnam ruh la sam da u Kongsan.
Kiwei kiba la ai jingkren ki kynthup ïa u Bah Bhalang Lyngdoh, u Bah R Wankhar nalor kiwei pat.