Ha ka dor shi tyngka hiar dor u Piskot, diaw mynsiem ki nongrep ka thaiñ Shilliang-um

Mawkyrwat, Risaw, 05: Ki nongrep piskot jong ka dong ka thaiñ shilliang-um mynta ka kynti ruh ki la don hapdeng jong ka jingnoh mynsiem namar katba nangrep kata nangsyrdep khamtam eh ha ka liang ka rep ïa u piskot uba ju long u mar rep uba ïaid ïew bha ha ki aïom ba dang sdang ban kheit hynrei ynda la katto katne taïew pat ka dor ka la hiar.
Katkum ka jingïathuh ki nongrep piskot jong ka thaiñ shilliang-um kata naduh ka shnong Mawthawpdah, Laitlawsnai, Rangdikhiew, Pyndenmawramhah, Mawsaw, bad kiwei de ki shnong kiba hap ha ka thaiñ Shngimawleiñ ki la ong ba ka long kaei kaei kaba sngewtamula ha kawei ka liang namar ka dor jong u piskot naduh ba sdang ban kheit u long ha ka dor kaba rem bha bad hadien tang katto katne taïew pat ka dor ka hiar kynsan kata na ka T. 30/- tyngka sha ka T. 9/- tyngka katba mynta pat u la hiar syndon haduh T. 1/- tyngka. “Kane ka long shisha ka kam kaba pynnoh mynsiem bad pynduh jingkyrmen shikatdei eh, namar bunsien la ju lap ba u mar rep u duna, ka jingdawa ka bun pynban ka dor pat ka rit, kumta daei pat kin pynbiang ïa ki jingdonkam ha ïing ha sem”, ong ki nongrep.
Ki la ïathuh ruh ba une u snem u dei ruh u snem ba jur bha slap bad u jingthung ruh u la shah pynjot ha ki bor jong ka mariang, hynrei haba phai ha ka jingpynïaid ïew pat ka long katjuh. Kumta ka la long kaei kaei kaba pynduh mynsiem ban bteng ïa kane ka kam hynrei watla kata ruh kumba ki la im ja kpoh baroh shikatta kim banse ban thom ïa ki jingeh la ka long ha kano kano ka bynta ruh tang ban pynbit pynbiang na ka bynta ki jingdonkam ha ïing ha sem naduh ki bai khaw, bai skul bad kiwei de ki jingdon-kam.
U bah Ferdinan Lyngkhoi uwei na ki nongrep piskot haba kren ha u nongthoh khubor u la ong ba hadien ka jingïoh sngew ïa ka jingud jingnam jong ki paidbah jong ka dong ka thaiñ ha kaba ïa dei bad ka dor ka mur kim banse ban phah ka khubor sha ki bor ba dei peit bad kumjuh ruh ban pynsngew sha ki shkor jong ka sorkar bad kumjuh ruh ha u Myntri ba dei peit ïa ka kam rep kam riang, bah Banteidor Lyngdoh ba ma u un tuklar lem halor kane ka bynta khnang ba kan long ka jingïarap na ka bynta ki paidbah.
U la pynsngew ruh ba haba phai ha ka kit ka bah, ha une u snem uba la dep ka don ka kali iTeam 1917 ba ki nongrep ki ju phah kit bad ki nongrep ki dang don hi ka jingïoh nong kaba malu mala namar la kit ïa u mar ha ka dor kaba kham biang hynrei naduh ba kane ka kali iTeam 1917 kam don shuh na ka liang ki paidbah nongrep ruh ki la sdang ban ud namar ban kit ïa ki mar rep la hap ban kit da ki kali shimet bad ha ka dor kaba rem bha. Ka dor ban kit ïa u mar rep naduh na shnong haduh ban da poi ha Shillong da ka kali iTeam 1917 ka poi tang T. 1,800/- ne T. 2,000/- hajar tyngka hynrei mynta pat ka poi haduh T. 5,000/- hajar tyngka shi pick-up namar la hap ban kit da ki kali shimet”, u la ïathuh bad kane ka la buh jingeh shikatdei na ka bynta jong ki.
Ym tang ha ka rep piskot, hynrei kiba bun ki paidbah ha ki shnong ki thaw ki im ruh ha ka ri jingri, ïathuh u bah Ferdinan namarkata, lada ym don ki kali kiba biang ban ïarap ha ka kit ka bah bun ki shem jingeh.
Namarkata, u bah Ferdinan Lyngkhoi ryngkat ki paidbah nongrep ki la buh ka jingkyrpad ba na ka sorkar lyngba ka Horticulture Department ba ka dei ban phai khmat lem sha ki paidbah nongrep ban peit lem ïa ka khia ka shon jong ki paidbah da kaba kin pynïoh biang ïa ka kali iTeam 1917 na ka bynta ka dong ka thaiñ South West Khasi Hills District khnang ba kan long ka jingïarap na ka bynta ki paidbah ha ka liang ka kit ka bah ïa ki mar rep.