Ha ka 27 tarik yn pyllait ka sorkar 93 klur tyngka ka scholarship sha ki 96,000 ngut ki samla pule

Shillong, Nailar 25 : Ka long ka khubor ba bha ïa ki samla pule ba ka Sorkar Jylla kan sa pynlait noh ïa ka 93 klur tyngka hapoh ka Umbrella Scholarship scheme na ka bynta ki samla pule Scheduled Tribe ha ka 27 tarik Nailar.
Haba pynbna ïa kane ha ka sngi Ba-ar, u Myntri Rangbah u Conrad K Sangma ula ong ba palat 96,000 ngut ki samla pule kin ïoh ïa kane ka pisa.
“Nga don ïa ka khubor kaba bha khamtam ïa ki samla pule. Ha ka 27 tarik Nailar, kaba dei lashisngi, ngin sa pynlait noh ïa ka Umbrella Scholarship sha ki samla pule ST jong ngi” ong u Conrad.
U iathuh ba ka pisa ka kynthup ïa 40% jong ka scholarship baroh lang, katba ïa ka 60% ba sah yn sa nang bud dien bad ka Tribal Affairs Ministry ka Sorkar Pdeng.
“Palat 96,000 ki samla pule kin ïoh kumba 93 klur tyngka ka scholarship ka ban long 40% na ka pisa baroh lang. Kaba sah 60% yn sa ïakren bad ka Tribal Affairs Ministry ka Sorkar India bad ngi kyrmen ba ngin sa ïoh noh shen ïa ka” bynrap u CM.