SHILLONG, Risaw 10: Ki dkhot jong ka National Yogasana Sport Federation (NYSSF) ryngkat bad ka Meghalaya Yogasana Sports Association (MYSA) ha ka sngi Palei (10 tarik Risaw, 2024) ki la wan shakhmat ban pynbna ba ka synjuk kan pynlong ïa ka rynsan lehkai yoga kaba la tip da ka ‘State Yogasana Championship’ ha nongbah Shillong.
Haba kren sha ki lad pathai khubor, na ka liang jong u Bah Daniel Dunai – President jong ka MYSA, u la pyntip ba kan don ka jingïakop leh yoga ha ka 14 tarik Risaw, 2024 ban sa pynlong ha Bharat Scout & Guide Auditorium, Shillong naduh ka por 7 baje mynstep.
U Bah Daniel Dunai u la pynshai ruh ha kaba ïadei bad kiba bun ki paidbah kiba shim bad sngewthuh bakla ba ka yoga ka dei ka rukom leh ñiam jong ki Hindu, hynrei u la kdew ba ka Yogasana ka dei ka jait jinglehkai (Sports) bad ka MYSA ka la ïoh jingithuh ruh na ka Meghalaya State Olympic Association.
U Bah Daniel u la ai khublei ruh ïa ka Sorkar jylla, naduh u Myntri Rangbah – u Conrad Sangma, u Myntri ka tnat Sports – Bah Shakliar Warjri, ïa ka ophis jong ka tnat Sports ka Sorkar Jylla bad ruh ïa ka MSOA kiba la ai jingithuh ïa kane ka Federation jong Ngi bad kiba la kloi ban kyrshan pynlong ïa kane ka rynsan ïalehkai yoga ha ka14 tarik Risaw.
Kumta na ka liang jong ka synjuk ka khot bad ïawer ïa baroh ki paidbah kylleng ka ri khasi Jaintia ba kin wan ïashimbynta ha kane ka jingïalehkai State Yoga Championship. ïa kane ka Championship la pynlong ryngkat ka jingthmu ban jied ïa ki nongialehkai kiba tbit ban leit ïashimbynta ha ki rynsan ïakop National level.
