Shillong, Lber 27 : Ka Khasi Hills Autonomous District Council (KHADC) ha ka sngi Palei ka la kular ban bishar bniah halor ka jingtyrwa ban peit ïa ki primary school kiba hap ha u pud u sam jong ka.
“Ïa kane ka kam yn sa bishar bniah bha da ka Executive Committee,” ong ka Executive Member ka tnad Education haba jubab halor ka jingkylli ba wanrah da ka MDC ka NPP na Nongpoh, Kong Rona Khymdeit.
Shwa kane, ka Kong Rona ka la buh jingkylli la ka EC ka don neem ka jingthmu ban peit biang ïa ki primary school katkum ka Khyrnit kaba Hynriew jong ka Riti Synshar jong ka Ri India.
Nalorkata, ka EM ka la kular ruh ban bishar bniah halor jingai jingmut da ki dkhot ka Ïing halor ka jingdonkam ban ai jingkyrshan ïa ki skul primary.
