Eden Park, Nailar 05: Ki thei ïalehkai jong ka Japan ki la nang pynjan ïalade ban rah ha ka sien kaba ar ïa ka burom kum ki lahduh jong ka Fifa Women’s World Cup hadien ba ki la pynliem noh ïa ki thei lehkai ka Norway ban ïohrung sha ka quarter-final.
Kane ka kynhun kaba la rah namlahduh ha u snem 2011, ka la sdang ban tehlakam ïa ka bol naduh kaba sdang jong ka jingïalehkai bad long ka jingma na ka bynta ki bak ka Norway, bad tang hadien 15 minit ba la ïaid ka por ka jingïai bteng jong ka Japan ban ñion shakhmat ka la ïoh ïa ka shi kol kaba la kum thep da ka Ingrid Engen kaba thmu ban ïada ïa ka bol ba la pynrung da k Hinata Miyazawa.
Hynrei watla kata ruh, ka Norway ka la ïoh ban pynïakhaid tang hadien san minit na ka Guro Reiten (20 min).
Ha ka 50 minit ka Risa Shimizu ka la ïoh ban buh biang ïa ka kynhun hakhmat lyngba ka kol kaba ar hashwa ba ka Hinata Miyazawa kan pynthikna ïa ka namjop da kaba khyrwit ïa ka kol kaba lai ha ka minit kaba 81.
Lyngba kane ka namjop, ki thei ka Japan kin hap ban aireng pyrshah ïa ka United States lane ka Sweden ha ka quarter final.
Haba phai pat sha kawei de ka jingïalehkai hapdeng ka Spain pyrshah ïa ka Switzerland kaba la long ha Eden Park, ka Spain ka la pynjemkhnap da kaba thep haduh 5 kol ban rung sha ka quarter final.
ïa ka namtam ha kane ka jingïakhun la leit sha ka Aitana Bonmati kaba la khyrwit ar kol na ka bynta ka ri (5′, 36′ min).
ïa kiwei pat ki kol la thep da ka Redondo (17′ min), nangta na ka Codina (45′ min) bad khadduh da ka Hermoso (70′ min). Katba ïa ka shi kol na ka bynta ka Switzerland la kum bakla thep hi da ka thei lehkai jong ka Spain, kata ka Codina ha ka 11 minit jong ka kylla step.
Kane ka kynhun kaba la ïalam da u Jorge Vilda’ kan sa hap ban aireng pyrshahïa ka Netherlands lane ïa ka South Africa ha ka quarter-final kaba la pynkhreh ha Wellington la Sngi Thohdieng jong ka taïew ban wan.
