Sohra, Rymphang 16: Ka Cricket Lovers bad ka Cricket Smit ki la jop ïa la ki jong ki jong ki jingïakhun ha ki ar tylli ki jingïalehkai ka lympung 4th District League T20 Cricket Tournament 2024, ba la pynlong da ka East Khasi Hills Cricket Association [EKHCA], hynnin ka sngi Saitjaiñ ha Sohra.
Baroh ar tylli ki kynhun ki la jop da kaba tied nyngkong, ha kaba ka Cricket Lovers ka la pynliem ïa ka Rangshken ACC da 32 ron, katba ka Cricket Smit ka la jop kput ïa ka Royal Rangers da 147 ron.
Ha ka jingïalehkai kaba nyngkong, ka Cricket Lovers ka la rai ban tied nyngtkong hadien ba jop ïa ka toss, bad ka la lah ban kamai 169 ron haduh kaba kut jong ka 20 ober bala mang da kaba khyllem 9 wiket. U Rohit Yadav ula long uba seisoh tam ha ka tied da kaba kamai 30 ron naki 35 bol, katba u Arnold Kharpuri u la khur 3/30 naki 4 ober naki rangkawang bol ka liang pyrshah.
Haba wanphai haka kylla tied, ka Rangshken ka la shah khanglad noh da tang 137 ron haduh kaba kut jong ka 20 ober bad khyllem 8 wiket, u Banshailang Kharphuli u la lah ban ïarap 28 ron naki 26 bol ha ka tied. U Damechwa Khongsngi u la khur 2/21 naki 3 ober. Ha kaba kut ïa ka nam Player of the Match la khur da u Mewankitbok M Kharpuri.
Ka jingïalehkai kaba bud, la sakhi ïa ka Cricket Smit kaba la shah pyntied nyngkong hadien ba ka Royal Rangers ka la jop ïa ka toss. Watla kata ruh, ka la lah ban kamai 266 ron haduh kaba kut jong ka 20 ober bad khyllem tang 4 wiket. U Raymond Thabah u la pynshlur da kaba khyrwit 82 ron naki 44 bol ban pynlah ïa ka Smit ban kamai 13 ron man ka shi ober. U Kevinstar Khongwar u la ïoh ban khur 2/39 naki 4 ober.
Haba pyrshang beh nadien u Lamphang Khongsngi u la ïarap da kaba kamai 36 ron naki 42 bol hynrei ka Royal Rangers kam shym la lah ban poi sha ka thong namar ka la lah ban kamai tang 119 ron haduh kaba kut jong ka 20 ober bad khyllem 7 wiket.
U Pynlong Khongshei jong ka Cricket Smit u la khur 3/21 naki 4 ober ha ka bowling hynrei ïa ka nam Player of the Match la khur da u Shankupar Kharbangar.
