Shillong, Risaw 19: Ka Shillong Archdiocese Catholic Youth Movement(SACYM) kaba dei ka synjuk ki samla jong ka balang Catholic jong ka jylla niambah Shillong ha ka sngi Balang ki la pynlong ïa ka jingduwai kyrpang na bynta
ki shit niam kiba pynthut ïa ka jingïakynduh lang jong ki samla ka balang Catholic jong ka jylla niam Khandwa kaba don ha ka jylla Madhya Pradesh(MP).
Ïa kane ka jingduwai la pynlong ha Ïingmane ka Maria ka Nongïarap ki Khristan ha Laitumkhrah ha kaba ki samla bad ki nongkitkam ka SACYM ki la poi ryntih sha kane ka jingduwai ïa snoh mynsiem bad ki samla ka jylla niam Khandwa.
Ha ka jingkren jong u Diocesan Youth Director u Fr Jemris Shylla u la khot la wer ïa ki samla ka balang ba kin duwai ba ka suk ka saiñ kan synshar ïa ka ri bad ba ka jingsnew pher niam kan ym ïoh rung ha ka jingpyrkhat jong u nongshong shnong ka ri.
“Kumba u Francis Assisi Bakhuid u duwai ba u Blei un pynlong ïa u u atiar jong ka jingsuk, ka jingieid, ka jingmap bad kiwei ki jinglong ba bha to ngi ruh kum ki samla ka Balang ngin duwai ba ngi ruh ngin long ki atiar jingsuk ha ka imlang sahlang,” u la kyntu kynpham ïa ki samla.
U Fr Jemris u la ong ruh ba ka thong hi jong kane ka jingduwai ka long ban tehsong mlon ïa ka ri wat hapdeng ka jingïapher ka jingngeit niam namar ka riti synshar ka ri ka la kdew shai ïa kane ba man u nongshong shnong ka ri u lah ban ngeit ïa kino kino ki jait niam kiba u jied hi.
“Kumba u Saulus u kylla sha u Paulus ngi duwai ruh ba kine kiba pynthut ïa ka jingïakynduh ki samla jong ka Diocese Khandwa kin long ki shipai ba shlur jong u Khrist ha kawei ka sngi. Ha ka aiñ barim la ong ka bniat namar ka bniat hynrei ka aiñ u Jisu ka dei ka jingsuk ka dei ban long ka nongkylliang ïa ka jingisih, ka jingieid ïa ka jingiashun bad dei tang lyngba ka jingduwai hi ba ngin lah ban kynjoh shata,” u la ong.
Haba kren sha ki lad pathai khubor hadien ba la wai ka jingduwai u President ka SACYM u samla Alvin Savio Kharkongngor u la ong ba da kane ka jingduwai kaba ki samla ki khot ka long ban ïasnoh mynsiem bad ki samla ka jylla niam Khandwa kiba la shah pynthut ka jingïakynduh lang ki samla Catholic naduh ka 2 tarik haduh 5 tarik Risaw hynrei la hap ban pynsahngeh na ka daw ba ki shitniam ki kynnoh ba kane ka jingïakynduh lang ki samla ka long ba pynkylla niam jubor ïa ki samla bad ha kaba na ka liang ki bor Pulit ruh ki la hukum marmar ban pynpep noh ïa kane ka jingïakynduh lang ki samla Catholic.
U la ong ha ka jingshisha kito ki samla kiba leit ba shim bynta ha kane ka jingïakynduhlang ki dei kiba ki kmie ki kpa ki la ai jingbit bad ruh ba u Parish Priest jong ki parish jong ki ruh u la pynshisha ïa kane bad ba ki samla kiba leit ruh ki kwah leit da ka mon sngewbha.
