Durut tyngeh ka SPB ban ïakhun ïa ka dheng kali ha nongbah Shillong

Shillong, Jylliew 18 : Ka Meghalaya State Planning Board (MSPB) shen kan sa phah ïa ka jingai jingmut sha ka sorkar jylla na ka bynta ban pynduh lane ban pynduna ia ka jingjur palat ka dheng kali ha nongbah Shillong.
Na ka liang u Chairman ka Meghalaya State Planning Board, Bah Metbah Lyngdoh haba kren bda ki lad pathai khubor, u la ïathuh ba ka Board ka la shim lut ïa ki jingai jingmut na baroh ki liang bad ki tnad ba dei peit ki dang bishar bniah ïa kine baroh, kiba long shi bynta jong ka sienjam ban ïakhun ïa ka dheng kali.
“Na ka liang ka Board kan sa ai jingmut ïa ka sorkar jylla na ka bynta ban pyntreikam ïa ki katto katne ki buit khnang ba yn lah ban pyntreikam pat ïa ka ha nongbah Shillong,” u la ong.
Ha kajuh ka por, u Bah Metbah u la ïathuh ba dang shen ka tnad ka la dep ruh ban shong pyrkhat haba ïadei bad ka tnad pule puthi ka sorkar jylla bad ong ruh ba ha kane ka jingïalang ki la banjur ïa ka jingdonkam ban don ka jingiatreilang ryngkat ryngkat bad baroh ki liang na ka bynta ban lah pynjanai pura ia ka pule puthi ha ka jylla.
“Ka Board ka la iatai bniah bad sani bha halor kane ka bynta bad ngi sngewthuh ruh ba ki don shibun ki bynta kaba donkam ban leh ha ka tnad. Hynrei ka bynta kaba kham kongsan hi ka long ban ka sorkar marwei kam lah satia ban leh ei ei hynrei donkam ka jingiatreilang jong baroh ban lah ban pynbha shuh shuh ia ka pule puthi ha ka jylla,” ula bynrap biang.
Ha kajuh ka por u Chairman ka Board u la ai ruh ka jingiaroh ia ka tnad pule puthi kaba la trei borbah na ka bynta ban kyntiew shuh shuh ia ka tnad.
“Kiwei ruh ki don ka bynta kaba khraw na ka bynta kane ka jingkylla bad ki don lang ruh kajuh ka jingkitkhlieh na ka bynta kane ka jingkylla ha ka tnad. Ki ruh ki don bynta kaba khraw na bynta ka jingkylla,” u la bynrap shuh shuh.